Jostein vassa i møk for å fanga oksen

Det var klokka 9.40 tysdag føremiddag at 110Vest meldte på X at ein okse hadde falt ned i ein gjødselskjellar, og stod oppreist i cirka 1 meter med gjødsel, eller møk som vi ville sagt i Kvinnherad. Brannvesenet i Rosendal rykte ut for å hjelpa til.

Okse på 600 kilo har falt i gjødselskjellar - ventar på utluftingsutstyr

Uhellet skjedde hjå bonde Trygve Nes.

– Slaktebilen var komen for å henta fire stutar. Denne stuten skulle òg vera med. På golvet ligg det ei rekkje med stålrister, og plutseleg sette han kloven fast mellom sprinklane i den eine rista. Då han løfta foten att, følgde rista med og vart liggjande skeivt over hòlet. Når då stuten trødde på rista igjen, gav ho etter, og dyret datt ned i kjellaren med bakenden fyrst, fortalde han til Grenda, medan han spylte vatn over fjøsgolvet etter at dramaet var over. Attmed veggen stod den 600 kilo tunge stuten og slappa av. Han unngjekk å bli sendt til slakt i denne omgang.

– No er det ferie, så han blir ikkje henta enno, sa Trygve Nes.

Vane med storlevande

Hjå brannvesenet vart brannkonstabel Jostein Vågen (28) den store helten. Etter aksjonen vart han intervjua både av TV2 og lokalavisene.

– No får eg reisa heim til Åkra og gå i dekning nokre dagar, humra han.

– Korleis var det å jobba nede i møkakjellaren? spurde Grenda.

– Mørkt, smilte Jostein.

– Men eg er oppvaksen på gard med storlevande, og har ikkje problem med store dyr. Litt møkalukt gjer meg heller ingen ting, la han til.

– Er det slik at det automatisk er du som skal gjera denne typen jobbar?

– Ja, det verkar nesten slik, lo Jostein.

Brannmannen understreka at ein tok alle moglege førehandsreglar før aksjonen vart sett i verk. Mellom anna sette ein på overtrykk med vifter for å jaga vekk farlege gassar frå møkakjellaren. Til å byrja med stod stuten rett under hòlet han falt igjennom, og då håpa ein at det skulle gå greitt å festa stropper under buken og heisa dyret opp med hjelp av kranbil. Men diverre flytta stuten seg bort derifrå og lenger inn i kjellaren. Dermed måtte nokon følgja etter.

Heilt roleg

– Planen var fyrst å gå inn i møkakjellaren og vassa bort til stuten, men møka var så seig at eg ikkje klarte å bevega meg. Men så stilte han seg opp rett innanfor ei luke på nedsida av låven, så eg kunne berre klatra igjennom og koma meg bort til han. Då fekk eg festa tau og halsband på stuten, og kasta ei line over ryggen på han og bort til hòlet i golvet. Dermed kunne vi dra stuten bort dit, og heisa han opp, opplyste Vågen.

– Var det ikkje farleg?

– Nei, stuten var faktisk heilt roleg, så det gjekk fint.

Oppdatert: Oksen er heist opp

Denne typen operasjon var ei ny erfaring for brannmannen som no bur i Omvikdalen, men opphavleg er frå Åkra. Til dagleg jobbar han i Reco.

– Dette er ikkje noko ein gjer kvar dag, nei. Men nye ting er alltid gøy, slo han fast.

– Eg bør kanskje ta meg ein dusj no, sa han og gjekk for å få av seg dei skitne klede.

Vart ei gladsak

Også for innsatsleiar Are Blokhus i Kvinnherad brann og redning var det ei ny oppleving.

– Dette er ei møkkasak som vart ei gladsak. Vi fekk litt utfordringar med at oksen bevega seg i møkakjellaren, slik at vi måtte finna ein ny angrepsposisjon. Vi brukte god tid, både grunna sikkerheita til mannskapet og til oksen, sa han til Grenda.

Då dyret var kome seg opp att, føretok dyrlege sjekk. Bortsett frå at stuten var litt nedkjølt, stod det bra til.

– Det var ein lur okse som unngjekk slaktebilen. Så 1-0 til oksen, humra Blokhus.