Jobbmesse for flyktningar: – Det er ikkje me som integrerer dei, men samfunnet

– Jobbmessa kjem som ein fylgje av at det har kome veldig mange flyktningar til Kvinnherad dei siste to og eit halv åra, då spesielt ukrainske flyktningar. Dei har eit veldig mykje kortare introduksjonsprogram som også er mykje meir arbeidsretta. Myndigheitene vil at dei skal fortast mogeleg ut i arbeid, fortel fagleiar for integreringsprogrammet i NAV Kvinnherad Anna Kathrine Bjelland Mathisen.

Flyktningar i jobb

– Me har no jobba veldig intenst og fått til gode samarbeid med både ulike bedrifter, innan helse og med kommunen sjølv. Me har prøvd å laga gode samarbeidsmetodar og rekruttering til behovet i kommunen. Det har vore mykje koordineringsarbeid ut mot bedrifter og kommunale einingar, legg ho til.

Mathisen fortel at dei også nyleg har blitt medlemar av eit nytt KS-nettverk som heiter «Flyktningar i jobb».

– Dette er eit tverrfagleg samarbeid med både personalavdelinga i kommunen, integreringsteamet, vaksenopplæringa, NAV-leiar og tillitsvalde. Me prøver å laga eit system av dette, der me tenkjer at det hadde vore fint å kulminera dette til ei jobbmesse i haust, forklarer fagleiaren.

Ikkje berre eit namn

Integreringsteamet er også dei som har ansvar for introduksjonsprogrammet og innhaldet i det. Mathisen fortel at dei har eit veldig arbeidsretta fokus i tillegg til at dei har teke i bruk nye verktøy som skal hjelpa flyktningane digitalt.

– Dei nye verktøya hjelper dei digitalt med å få laga cv-ar og søknadar og slikt. Det er mykje førebuing til ei slik jobbmesse, også for deltakarane som skal koma dit og selja seg inn til bedrifter. Dei lærer utruleg mykje av å vera ute på desse arenaene, heller enn å berre sitja på skulen og senda søknadar som då har utanlandske namn, seier Mathisen.

– For arbeidsgjevarane sin del seier mange av dei at det er fint å få møta dei, i staden for å berre sjå eit namn på papiret. Ein ting er å veta kva du skal gjera, men det er utruleg mykje læring i å møta bedriftene. Me tenkjer også at skal ein få til integrering, så må ein også få til inkludering, fortset ho.

Fagleiaren er klar på at formålet er å gjera flyktningane meir sjølvstendige.

– Det vil vera lettare å finna sin plass i arbeidslivet dersom ein får eiga prosessen og ta ansvar i sitt eige liv gjennom å skriva cv-en, møta opp og snakka med aktørane sjølve. Ein slik arena som ei jobbmessa kan difor vera viktig. Det hadde det i alle fall vore for meg, eg vil jo helst ha ei hand på rattet sjølv, helst to, poengterer Mathisen.

Eit viktig signal

Vidare seier Mathisen at dei har sett ein stor velvilje i arbeidslivet og at dei har stor tru på prosjektet.

– Me har veldig trua på at det å jobba på tvers og jobba i lag kan vera løysinga på ein del rekrutteringsbehov også. Mange kjem med mykje kompetanse, og jobbmessa blir ein arena som me kjem til å bruka som ein del av undervisninga, fortel fagleiaren.

– Det er mange som er opne for samarbeid, og det er fint for deltakarane som kjem og får sjå det i praksis. Det at alle desse har sett av tid denne dagen for møta nettopp dei. Me tenkjer at det sender eit viktig signal og at det er viktig at me er synlege og lagar arenaer der dei kan vera synlege. Det er ikkje me som integrerer dei, men samfunnet. Då må dei få arenaer til å gjera nettopp det, avsluttar ho.