Jobbar vidare med kvartsprosjektet

Det norske gruveselskapet Nordic Mining presenterte nyleg sin kvartalsrapport for 2. kvartal. Den eine sida handlar om Kvinnherad, og inneheld fire kulepunkt.

• Nordic Mining har inngått grunneigaravtaler, og fortset evalueringa av kvartsførekomsten.

• Dei validerer no kvartskvaliteten og homogeniteten gjennom testar.

• Arbeid som føregår for tida inkluderer planlegging av arealbruk og innleiande vurderingar kring den sosiale og miljømessige påverknaden.

• Nordic Mining er i dialog med fleire potensielle partnarar om mogleg salsavtale og/eller samarbeid.

4 millionar tonn

Ifølgje nettstaden Geo365.no er Nordic Mining sitt fokus enno på å ferdigstille utbygginga og starta drifta av Engebø-prosjektet i Sunnfjord kommune. Selskapet stadfestar at produksjonen skal starta i fjerde kvartal i år.

«Men parallelt med utbygginga av Engebø-prosjektet, har Nordic Mining gjenoppteke arbeidet ved eit anna mineralprosjekt. Seint i 2023 meldte selskapet at det har inngått ein samarbeidsavtale med eit ikkje namngjeve selskap vedrørande leiting og utvikling av Nesodden kvartsførekomst i Kvinnherad kommune i Vestland. Nordic Mining gjennomførte boringar på førekomsten i 2015, og analyser av borekjernane bekrefta at kvartsen er svært rein (opptil 99,9987 prosent silisiumdioksid etter prosessering). Slik høgrein kvarts kan brukast til høgteknologiske føremål som elektronikk og solceller», skriv nettavisa.

Ifølgje ei kartlegging utført av Norges geologiske undersøkelse (NGU), består kvartsfeltet på Lyngstranda av ei åre av massiv kvarts. Den er 580 meter lang og cirka 12 meter brei. Geo365 skriv at Nordic Mining har estimert mengda til vel fire millionar tonn.

«Ein omfangsstudie frå 2012 har indikert at ei småskala drift av førekomsten kan vera lønnsam, ha eit avgrensa miljøavtrykk og gje arbeidsplassar til 30-40 personar», opplyser Geo365.no.

Oppfyller krava

Nettstaden skriv elles at EU har definert silisium (metall) som eit kritisk råmateriale for unionen. Norske Elkem leverer om lag 30 prosent av alt silisium som i dag vert brukt i den europeiske marknaden. Norge står i alt for 35 prosent av leveransane. Sjølv om kvarts er eit svært vanleg industrimineral her i landet, er det berre eit lite antal av dei norske førekomstane som oppfyller kvalitetskrava for råstoff til silisiummetall.

«Silisium med rundt 95 prosent reinleik kan brukast til legeringar, medan halvleiarkomponentar i elektronikk krev ein reinleik på meir enn 99,9999 prosent», informerer Geo365.no.