Jobbar med å innhenta elektroniske spor – ynskjer tips om bilen

Søndag sendte Vest politidistrikt ut saknamelding etter Kjell Edvin Ølmheim (48), dette i samråd med familien hans. Ølmheim, som ikkje bur i Kvinnherad, vart sist sett i bustaden til eit familiemedlem på Halsnøy fredag morgon.

«Han har kort, tynt, mellomblondt hår, er litt kraftig, cirka 170 cm, og har luta gange. Han brukar briller med mørk innfatning, og har mogleg på seg allvêrs- eller boblejakke», stod det å lesa i pressemeldinga frå Vest politidistrikt.

Politistasjonssjef Sigurd Børve ved Kvinnherad politistasjon kjem måndag føremiddag med følgjande oppdatering:

– Status er at vi framleis ikkje har funne personen, og vi har heller ikkje fått inn ny informasjon. Vi kan difor ikkje starta søk på konkrete plassar enno. Politiet jobbar no med å innhenta elektroniske spor, som ferjeregistreringar, bruk av bankkort og anna. Vi kan heller ikkje seia om han er i Kvinnherad framleis, fortel Børve.

Bilen

Han legg til at bakgrunnen for etterlysinga, er at familien er bekymra for personen, og ynskjer å koma i kontakt med han for å sjekka tilstanden hans.

Politiet er vidare svært interessert i observasjonar av bilen til den sakna; ein grå Honda CR-V 2006 modell med kjennemerke SU27433.

Om nokon har sett vedkomande eller har opplysingar om kor han kan vera, ber politiet om at dei kontaktar tipstelefonen 47 69 60 60.

Tekst: Gina Eriksen Albrethson