Jobbar framleis med å styrka skulehelsetenesta

Dette kjem fram i eit saksframlegg til neste møte i Levekårsutvalet, der det blir tilrådd at Kvinnherad har ei skulehelseteneste som er i tråd med nasjonale normtal, som er 300 elevar per årsverk.

Kvinnherad kommune har dei siste åra motteke statleg tilskot for å styrke skulehelsetenesta opp mot normen, men kommunen har også vedteke at det skal setjast av pengar til finansiering av ei stilling i skulehelsetenesta i budsjettet.

Ikkje følgt opp vedtak

Etter ei sak i levekårsutvalet 3. juni 2020 vart det vedteke at Kvinnherad kommune skulle styrka tenesta med ei stilling frå og med 1. september 2020.

«Denne styrkinga har ikkje skjedd, og talet på stillingar i skulehelsetenesta, og tidsplanen om styrking er ikkje følgt opp», heiter det i saksframlegget.

Arbeidet med å sikre ei skulehelseteneste som svarar til dei nasjonale rammene er omtala som kostbart, mellom anna grunna skulestrukturen som fører til at det går ein del tid i reising, møteverksemd og deltaking i ressursteam.

«Skulane som får styrking gir gode tilbakemeldingar, og skular som har mindre tilgang til helsesjukepleiar etterlyser betre oppfølging av elevar. Vi ynskjer at kommunen vidarefører satsinga på skulehelsetenesta slik at alle elevane får eit godt nok tilbod», skriv Sturla Helland, einingsleiar for Barn og familie, i framlegget.