Jobbar for historisk budsjett

Alle partia som er representerte i kommunestyret er samde om å diskutera moglegheita for eit felles budsjettframlegg.

Formannskapet hadde budsjett 2022 og økonomiplan 2022-2025 oppe som sak torsdag kveld. Som venta vart det ingen diskusjon om detaljane i budsjettet, det vil fyrst skje i kommunestyremøtet 25. november. Men kanskje kan ein då oppleva at alle partia stiller seg bak same forslaget. Det er nemleg invitert til møte på tysdag for å drøfta denne moglegheita.

– Vi er i ein sær situasjon, i og med at vi ikkje har ei plattform. At vi i utgangspunktet prøver å stå saman, trur eg i denne situasjonen hadde gjort godt, sa Synnøve Solbakken (Ap).

– Kvart parti har si eiga, vesle plattform, og dei skal vi prøva å føya saman, funderte Leif Sverre Enes (H).

Eit hårete mål

Også Enes drøymer om eit budsjett som alle partia står bak.

– Det er mogleg det har skjedd før, eg har ikkje vore i politikken så lenge. Det hadde gledd meg mykje om det vert eit samla kommunestyre, men det er eit hårete mål, smilte han.

Ein annan politikarveteran, Gunnar Våge i Sp, sat og kikka bort på veggen der det heng tre rader med fotografi av Kvinnherad sine tidlegare ordførarar.

– Eg trur du må eit godt stykke bort på midtrekkja for å finna førre gong det var eit felles budsjett. Eg ser fram til at dette vert eit historisk år, sa Våge.

Truleg har dei rett i at det er lenge sidan samtlege parti røysta for same budsjettforslaget. Det næraste i seinare tid, var hausten 2015 då Ap, Sp og Høgre laga felles budsjett. Men den gong hadde både KrF og Frp eigne alternativ, og heller ikkje SF og MDG støtta dei tre store partia.