– Jobbar for ei betre framtid for andre

Operasjon Dagsverk er Noregs største solidaritetsaksjon som er av, med og for ungdom. Det er ein organisasjon som gjer ungdom medvitne om at dei kan bidra til ein meir rettvis verden.

Kvart år har dei ein dag der ungdom jobbar for midlar som går til andre. I år har prosjektet tittelen «Skotsikker framtid» og går til utsett ungdom i Colombia.

– Veldig mange av ungdomane i Colombia tek ikkje utdanning, og det er mykje vald, kriminalitet, narkotika og til og med sjølvmord der nede. Det er lett å bli slukt inn i eit sånt miljø, så i år samarbeider Noreg med 4 ungdomsorganisasjonar i Colombia, fortel Mari Teigen Varanes ved Kvinnherad Vidaregåande Skule.

Organisasjonane Operasjon Dagsverk samarbeider med er ein elevorganisasjon ved namn ANDES, to urforlorganisasjonar (CRIC Jovenes og Movimiento Juvenil) og ein organisasjon for afro-colombianarane sine retter (PCN Jovenes).

Sjå litt lenger

Midlane som blir samla inn skal gå til alternative møteplassar for ungdommen i Colombia. Det skal også gå til kursing i korleis stå opp mot kriminalitet, kva rettigheiter ein har og korleis ein kan involvera seg i politikk.

– Eg tykkjer det er bra med ein dag det er fokus på noko anna enn Kvinnherad, at ein kan sjå litt lenger utover. Og at ungdommen her i Kvinnherad og Noreg gir ein dag av sin utdanning til andre som kanskje ikkje har moglegheit til utdanning i det heile er veldig fint, seier Teigen Varanes.

I fjor gjekk midlane til prosjektet «Psykisk helse i Uganda», og til saman i Noreg samla ungdommen inn 14 300 000 kronar. KVV var ansvarleg for 62 000 av dei.

Ungdom i arbeid

95% av elevane på KVV bidreg til Operasjon Dagsverk i år. Dei er ute og jobbar ved forskjellige bedriftar for å skapa ein betre framtid for andre.

– Det er kjempebra at så mange er med, vi er skikkelige nøgde her på skulen. I fjor var første år på lenge at vi var med, og engasjerte elevar fekk dradd det i gong i år og, det er flott, fortel ei stolt Teigen Varanes.

På Varehuset gåver og interiør i Rosendal fann vi Ida Rantrud på jobb. Ho har tatt turen heilt ifrå Bergen for å jobba her på OD-dagen.

– Eg hadde sommarjobb her i sommar, og når eg skulle finna ut kva eg ville gjera på OD-dagen tenkte eg at eg ville ha ein faktisk jobb, så eg ringte og høyrde om eg kunne få komma tilbake, fortel ho.

Ida går i tredje klasse på musikklinja på Langehaugen Vidaregåande skule. Familien har hytta i Omvikdalen, og ho fortel at farmor sin onkel var derifrå.

– Eg likar meg godt her i Kvinnherad. I Bergen er alt så tett og innpakka, men når eg er her får eg ro i sjela, seier ho.

På Varehuset gåver og interiør har ho ein arbeidsdag med fleire varierte oppgåver.

– Både i dag og i sommar har det vore veldig kjekt. Det er kvar dag noko nytt, og eg får snakka med kundar og læra nye ting, og så er det jo kjekt å rydda og organisera ting i hyllene, avsluttar Ida.