Jenter i fleirtal på kjemiprosess

Røneid seier det er første gong denne linja har overvekt av jenter, og han peikar på at ein av grunnane kan vera at verksemder som Hyrdro og Equinor har gått ut og sagt at dei ynskjer fleire jenter inn som lærlingar.

Men kvifor det er blitt slik, let han elevane sjølv svara på.

– Eg har valt denne linja fordi eg vil ut i olja. Eg trur også det handlar om at jenter også har lyst å gjera noko praktisk, ikkje berre sitja på kontor, seier Ariana Quam frå Halsnøy.

Ho tok studiespesialiserande på vg1, men søkte seg inn på kjemiprosess- og laboratoriefag til andre året. Dette gjorde også Celine Musland frå Uskedalen og Hilde Marie Sandvik frå Seim.

Hilde Marie støttar opp under Røneid sin teori.

– Tidlegare har kanskje ikkje jenter søkt seg til yrkesfag som dette fordi dei har vore redde for å ikkje få lærlingplass, fordi dei er fysisk svakare eller frykta at dei ikkje ville ha passa inn på arbeidsplassen. Men når Hydro til dømes går ut og seier at dei ønskjer fleire jenter, blir det jo tryggare å søke på linjer som dette, seier ho.

Lokalt tilbod og etterspørsel

Kjemiprosess-linja vart oppretta etter initiativ frå Hydro Husnes og Kvinnherad kommune, nettopp fordi at den lokale industrien ynskjer lokal rekruttering. I desember 2018 vedtok Fylkesutvalet at faget VG2 kjemiprosess skulle opprettast ved Kvinnherad vidaregåande frå hausten 2019, og etter tre år er linja vel så populær for jenter som for gutar.

Patrick Ersland frå Sandvoll og Ariana er blant dei som allereie har fått læreplass ved Hydro, noko dei er svært nøgde med.

– Eg skal bli lærling i prosessoperatørfaget, det er no ein ganske ettertrakta kompetanse å ha, fortel Patrick.

Første året gjekk Patrick på TIP, og han har vore målretta i det å ville bli lærling på Hydro. Gjennom vg2 har kjemiprosess-klassa vore på fleire bedriftsbesøk, der dei mellom anna har fått eit innblikk i korleis dei jobbar ved det lokale aluminiumsverket. Både han og Ariana ser såleis fram til å kunne ta læretida i heimkommunen.

– Det er jo motiverande å søke på ei linje der ein nesten er garantert lærlingplass, held Ariana fram.

Nytt og etterlengta tilbod ved KVV

Godt klassemiljø

Hilde Marie og Celine har tenkt å gå vidare på påbygg til neste år, men dei tykkjer kjemiprosess har vore ein kjekk klasse å gå i.

– Det er jo veldig trivelege folk i klassen, og vi legg eigentleg ikkje merke til at det er fleire jenter enn gutar, seier Celine.

– Nei, vi er ein veldig samansveisa gjeng, skyt Patrick inn.

Til andre som har lurt på å søka, eller som skal søke seg til vidaregåande seinare, påpeikar elevane at det er ei teoritung linje, med mindre praksis enn ungdommar flest trur.

– Men etter å ha tatt studie første året, synest eg eigentleg det har vore lettare i år. Det har nesten vore litt luksus, smiler Hilde Marie.

Sjølv om ho skal fortsetja med påbygg, utelukkar ho ikkje at det blir læretid i faget etterpå.