Jazzutøvar spelte inn kortfilm i Rosendal
Jazzutøvaren Marius Neset, som framførte det nye stykket «Who We Are» under årets Rosendal Kammermusikkfestival, spelte like så greitt inn ein kortfilm under opphaldet sitt i Rosendal denne helga.
Publisert
Det var mange kjente musikantar under årets Rosendal Kammermusikkfestival, deriblant norske jazzsaksofonist Marius Neset frå Os, som no er busett i København. Han framførte mellom anna bestillingsverket «Who We Are» under finalekonserten søndag, saman med blant anna festivalsjef og pianist Leif Ove Andsnes.
Neset ser ut til å ha nytta tida si godt i Rosendal denne helga. Søndag, etter finalekonserten, spelte han spontant inn ein kortfilm med eit amerikansk filmcrew. Filmen vart filma på flata på Skeie.
Annonse
Prisvinnande serie
Det amerikanske crewet var nemleg i Rosendal for å filma eit intervju med festivalsjef Leif Ove Andsnes, for den prisvinnande serien «Living the Classical Life». Både musikanten Neset og den vakre naturen i Rosendal inspirerte amerikanarane til å utvida produseringa deira under opphaldet.
– Medan det amerikanske crewet var tilstades under festivalen høyrte dei nokre av framføringane til Marius Neset. Dei likte det så godt at dei spurte om dei kunne intervjua han, og heilt spontant bestemde dei seg for å laga ein kortfilm der Marius framførar musikken sin ute i naturen. Dette vart filma på søndag, rundt midnatt, seier pressekontakt for Rosendal Kammermusikkfestival Lucy Maxwell-Stewart, som jobbar i Red House Productions.
