Jan Henry (78) ilte til Nord-Makedonia på jobb

– Det oppstod eit problem her nede, og då blei eg spurt om å dra ned raskt og ta over som reiseleiar. Det gjorde eg, fortel uskedelingen Jan Henry Sunde til Grenda.

Nett no er han i Ohrid i Nord-Makedonia. Førre onsdag var han i Rosendal, med eit følgje på 22 som skulle ta Salmon Eye nærare i augesyn. Sjølv om mange kanskje har fortrengt det, var råsene i sydausten i Rosendal på høgste merket denne dagen, og det vart vurdert til uforsvarleg å ta båt ut.

– Det med vêret er vanskeleg å vita om på førehand. Det er synd me ikkje kom oss ut, seier han.

Sommarvikar

Trass ein alder der mange har vore pensjonistar i både ti og femten år, held Jan Henry framleis koken i arbeidslivet, nærare bestemt reiselivet.

– Det er viktig å halda seg aktiv, humrar han.

Før påske hadde han frå seks veker i Portugal, som reiseleiar for grupper på Algarvekysten.

– Eg har ikkje gitt meg enno. Så lenge eg er oppegåande, så held eg på. Eg organiserer grupper og leiger meg ut som reiseleiar til andre. Eg har bra program i år også, så eg kjedar meg ikkje, meiner Jan Henry.

Han gler seg over at aktiviteten i reiselivet tar seg opp att no etter koronapandemien.

– Det blir meir å gjera. Under pandemien fekk ein jo ikkje tak i utanlandsk arbeidskraft, og heile Norge var på tur til Vestlandet, så eine covid-sommaren tok eg meg sommarjobb på Olden Fjordhotel. Då måtte eg trø til over alt i hotellldrifta, både som gartnar og servitør, sjølv om det var resepsjonist eg var tilsette som, minnest den utflytta uskedelingen.

Baroniet trekkplaster

Sunde hadde gledd seg til besøket på Salmon Eye, både for å få sjå sjølv, og ikkje minst visa det fram til gjengen han hadde med seg.

– Eg hadde med tidlegare og noverande reiselivsfolk, som eg tenkte ville ha nytte av å vita kva Salmon Eye har å tilby turistar. Eg tenkjer på «lakseauga» som eit reisemål for grupper, men om det er noko for marknaden eg opererer i, til dømes pensjonistforeining og andre grupper, er vanskeleg å seia før eg har sett det, seier Sunde.

– Korleis er Kvinnherad som reiselivsmål?

– Rosendal er senteret, med Baroniet som hovudtrekkplaster. Steinparken, Folgefonnsenteret og Salmon Eye gjer at du no kan laga fleirdagarsturar til Rosendal for grupper. Legg ein inn Jondal – Tørvikbygd på returen til Bergen, så har du Olaløo og Ænes-kyrkja som klassiske stopp på veg tilbake, vurderer Jan Henry.

Han meiner at for dagsturar så blir det nok med to av.

– For det som eg driv med, med dagsturar og grupper med eldre, så er det Rosendal eg promoterer og tar med folk til her i området, sluttar Sunde.