– Ja, det er gjort endringar i bruken av fysioterapeutane sine behandlingsrom på Husnes

– Det stemmer at vi tidlegare hadde ope for eigentrening på bestemte tidspunkt, når romma ikkje var i bruk av terapeutane. Det endra seg etter at vi bygde om og endra bruken av lokala, seier Eylegar.

Romma er no terapeutane sine behandlingsrom og dei er difor ikkje opne for publikum. Dei vert nytta av barn og vaksne som er i behandling. Tenesta køyrer fleire ulike gruppetreningar, og kapasiteten på behandlingsromma er difor mindre enn før.

– Då vi hadde ope for eigentrening opplevde vi dessutan enkelte episodar der folk ikkje overhaldt tidene dei hadde fått tildelt, men kom når terapeutane hadde pasientar inne, og kommenterte det som gjekk føre seg. Dette er ikkje greitt av omsyn til personvern, og vi har fått tilbakemeldingar på at pasientar har opplevd det ubehageleg, held ho fram.

Vidare peikar ho på at behandlingsrommet er ein stad dei ønskjer å ha tilgjengeleg for å kunne teste ut ulike tilnærmingar spontant, og då er det naudsynt at rommet er ledig. Behandlinga deira er dessutan underlagt teieplikta, og då skal ein heller ikkje ha andre der.

– Men dei som ynskjer behandling og opptrening kan ta kontakt med oss. Alt etter problemstillinga gir vi både individuell behandling og behandling i gruppe. Vi har diverre ikkje kapasitet til å køyre kontinuerlege opplegg, for då seier det seg sjølv at vi ikkje får sjans å ta inn nye pasientar, held Eylegar fram, og legg til at etterspurnaden etter behandling hos fysioterapeut er stort.

Viser til andre moglegheiter

Ho understrekar dernest at det finst to andre treningsstudio på Husnes som kan nyttast av dei som ikkje er i behandling hos fysio- eller ergoterapeutane. I alle fall det eine treningsstudioet er, i følgje Eylegar, tilgjengeleg for menneske med rørsleutfordringar. Samanlikna med behandlingsrommet hos fysioterapeutane er desse treningsstudioa dessutan mykje betre utstyrt med ulike apparat, som Eylegar tenkjer at dei som ynskjer å trene jamleg kan nytta seg av.

– Vi har dessutan varmebassenget, der ein kan trene på eiga hand nesten kvar dag. Eg vil òg slå eit slag for Feelgood-konseptet på Rosendalstunet, der er det treningsapparat tilpassa alle funksjonsnivå.

Avslutningsvis forklarar Eylegar korleis dei jobbar ved eininga, og grunngjev samstundes kvifor dei har valt denne metodikken.

– Når vi no har satsa på å ha fleire gruppetreningar, betyr det at dei som deltek kanskje får to behandlingar i veka over ein kortare periode. Vi jobbar kunnskapsbasert, og då ser vi at det beste er å trene intensivt i ein periode, for dernest å ha ein pause. Det er såleis veldig få som har eit kontinuerleg tilbod.

- Ikkje langt unna revolusjonerande