Ivrige spelarar inntok storstova: – Me har gleda oss

Fotballcupen gjekk både laurdag og sundag, og sundagen var det duka for 11-åringane sin tur til å kjempa om ballen. Hallen var delt i to banar, og ein av dei fyrste kampane for dagen stod mellom Rosendal og Halsnøy.

Gøy likevel

For Halsnøy sine to lag vart dette deira fyrste cup for året.

– No har me hatt ein liten pause sidan byrjinga av desember, så dette blir kjekt. Gutane her er ivrige, og sjølv no medan me har hatt pause har dei møttest på bana for å spela i lag. Det er berre fint, det er jo slikt ein blir god av, seier Halsnøy-trenaren Gisle Eide.

Det var tydeleg at spelarane var klare for å setja i gong.

– Ja, dette blir gøy, me har gleda oss, fortel Torstein, ein av spelarane som for augeblinken heng i ribbeveggen medan lagkameratane som skal spela kamp spring rundt på bana for å varma opp.

For motstandarlaga frå Rosendal derimot vart denne cupen deira andre cup for året. Dei valde nemleg å vera med på ein innandørscup i Odda tidlegare i vinter.

– Me har halde på med cup sidan januar, og har i grunn spela fotball nesten heile året. Me hadde ein liten pause i desember einaste. Dei er ein ivrig gjeng både på og utanfor bana. Ofte møtest dei også utanom trening berre for å spela, i tillegg til at fleire av dei driv med andre ting også, seier lagleiar Margit Lund-Mikkelson.

Også Rosendal, som er eit kombilag med spelarar frå både Rosendal og Uskedalen, hadde to lag med på cupen. Det laget som måtte vente på neste kamp gledde seg til å spela, samtidig som dei håpa på betre resultat enn førre gong.

– I Odda gjekk det dårleg, me tapte alt. Men det var gøy likevel, understreka Rosendals-spelaren Per Håkon.

Ikkje så langt

For vertslaga Trio var det ekstra kjekt å få spela cup på heimebane.

– Når me no har mogelegheita med desse banane her i Kvinnherad Arena, så er det veldig kjekt med innecup her hjå oss. Dette blir vår andre cup for året, og ungane er veldig klare for å spela i dag, fortalde lagleiar Marius Olsen.

– Målet er å ha det kjekt. Det er også veldig kjekt at det kjem lag frå Bømlo for å spela i dag òg, la han til.

Dei med desidert lengst reiseveg på denne cupen var nemleg Bremnes Meling/Gilje frå Bømlo, ikkje at det gjorde noko i fylgje lagleiar Kenneth Larsen.

– Det er jo ikkje så lang tur. Det er veldig kjekt å vera her, det er fint vêr og det er ein utruleg flott hall, skrytte Larsen.