Ivrige gledes-ambassadørar kom på døra til eldre naboar

– Dette er eit nytt prosjekt for oss, me trur det blir bra, seier Anja Regin, avdelingsleiar for «Skulespirene», avdelinga for dei eldste ungane i Espira Halsnøy Kloster.

«Livsglede for eldre» er ein folkehelseorganisasjon som jobbar for at alle eldre skal ha ein god og meiningsfull kvardag. Dei har erfart at møte mellom barnehageborn og eldre kan gje gode opplevingar for både gamal og ung, og at borna kjenner at dei kan bety noko for andre. Difor har dei invitert barnehagar over heile landet til å bli såkalla «livsglede-barnehagar», som oppsøker eldre.

Lykter og song

13. desember plar skulespirene å gå luciatog på Halsnøytunet og servera heimebakte lussekattar. Men tysdag var det folk i nabolaget til barnehagen i Eidsmarka som skulle få besøk.

– Eg likar å gleda andre, for eg vil at alle skal bli glad, seier ein av ungane med eit forventningsfullt smil.

– Korleis er det de skal gleda andre då?

– Me går til naboane! Me skal gje lykter! Då får me sjå mange smilefjes! Me har laga lyktene!, seier femåringane ivrig.

Takksam nabo

Som førebuingar til dagen har ungane laga lykter av glas med fin julepynt på. Desse skal delast ut til naboane som får overraskingsbesøk. I tillegg har ungane øvd på songar som dei skal syngja. To og to ruslar dei ut porten.

– No vart eg veldig glad, dette var så koseleg!, utbryt Hannemor Gravdal Kristensen, den første som får skulespirene på døra.

Ho får høyra to fine songar, og får utdelt ei lykt. Ho klappar hendene saman og set tydeleg pris på visitten.

– God jul til alle saman!, ropar ho etter dei når dei går vidare.

Det er ikkje alle naboane som er heime, sidan besøket skulle vera ei overrasking. Kjem gruppa til eit tomt hus, passar dei på å setja ei lykt og eit lite brev utanfor døra.

Den gode samtalen

– Gler de dykk til jul no då?, spør Laila Lomheim, som også har fått song og lykt.

– Jaaa!, ropar alle.

– Men eg har øydelagt kalenderen min, seier ein av gutane.

– Har du opna alle lukene?

– Ja, eg opna alle på ein gong. Eg gløymte meg.

– Men no skal eg i alle fall tenna lys i denne lykta, den var så fin. Det var veldig kjekt å få besøk av dykk!, smiler Laila Lomheim.

Det er lett å sjå at naboane får ei koseleg, lita stund med besøk på døra. Ungane syng fint og klart, og det er tydeleg stas å gje lykta i handa til den dei besøker. Avdelingsleiar Anja Regin seier dette berre er starten på Livsglede-prosjektet.

– Me har lyst til å ta ein tur til rundt i nabolaget før jul. Og så vert det planlagt fleire aktivitetar saman med bebuarar på Halsnøytunet framover, seier ho.

Liten og stor på Halsnøy kan altså sjå fram til fleire generasjonsmøte og fine stunder saman.