Isolerte taket i Åkra kyrkje

– Straum er blitt veldig dyrt så vi prøvar å redusera forbruket litt. Vi har jo òg hatt problem med å få opp varmen når det er kaldt, så i staden for å fyra på med meir varme vel vi å isolera, fortel Alf Jarle Langeland.

I lag med Helge Furdal og Trond Inge Kvandal har han lagt ned om lag 120 timar på å isolera loftet. I tillegg har dei bytta ut alle glødepærene med LED-lys og fornya termostatar og styring av varmen.

– Vi har gjennomført ein del prosjekt i løpet av dei siste åra. Vi har fått varmepumpa i Uskedalen, forbetra varmepumpene på Husnes og Valen, fått nye omnar i Eid og Kvinnherad kyrkje. Vi har mange prosjekt på gang for å få ned straumforbruket, seier Langeland.

– Vi har også oppgradert alle lysa og gjort ein del andre ENØK-tiltak fleire plassar, fortel Trond Inge Kvandal.

God varme

Åkra kyrkje vart oppførd i 1735 og har vore heller dårleg isolert. Eit to cm tjukt lag med isolasjon har vore alt som har heldt på kulda. Ikkje har det funka særleg bra heller.

– Vi hadde 12 grader her ein gong når det var minusgrader, det var litt i minste laget. Det er veldig godt at dette endeleg blir gjort, det kjem til å merkast både på varmen og straumrekningane, seier Langeland, og legg til;

– Kva tid den eksisterande isolasjonen vart lagd, veit vi ikkje, kanskje ein gong på 50-talet. Vi må nok sjå på dei andre kyrkjene også, vi veit jo at nokre av dei litt eldre ikkje er så godt isolerte, der bles det rett gjennom.

No har dei lagt ned 20 cm isolasjon med duk oppå, som skal hindra vinden i å koma gjennom. Noko estimat på kor mykje dette kan spara, har dei ikkje, men fortel at dei blir ikkje overraska om straumrekninga vert halvert.

– Vi får jo konsesjonsstraum frå kommunen, men ein skal ikkje sløsa likevel. Det vi ikkje brukar kan kommunen selja som igjen vert inntekter for dei, seier Langeland.

Sidan det er kyrkjetilsette som gjer arbeidet, sparer dei litt der òg.

– Det er ein fornuftig og grei måte å utnytta tida til folk på. Om sommaren har vi fullt opp med plenklypp og slike ting, så vi må ha noko å gjera om vinteren og, ler Langeland.

Førebygging

Dei fleste tiltaka som er gjort sparar ikkje berre straum, men lettar òg annan uro.

– Å bytta over til LED gjer jo at det er mindre sjanse for brann, og det er nok det viktigaste av alt. I hus skifter ein ut sikringsskap og alle slike ting, men det som er i kyrkjene er ofte eldre. Vi har funne nokre leidningar og anna som ikkje er så gode, som òg må bytast ut, fortel Furdal.

Hadde det teke fyr her hadde verken Husnes eller Rosendal kome fram i tide, og den vetle vogna vi har er ikkje god nok til å sløkka store brannar, stemmer Langeland i.

– Heldigvis er det ikkje så mange kyrkjer som har brent ned utan at ein greve er involvert, ler Kvandal og referer til då Varg «Greven» Vikernes sette fyr på tre kyrkjer på 90-talet.