Isak André var første Bunnpris-kunde - etterpå fekk han kake

I døra kunne dagleg leiar Carl Bruno Bodin stå og handhelsa på gamle og nye kundar, og framtidig fram franchisetakar Raymond Johansen kunne smila breitt over det nye lokalet Bunnpris har fått på plass.

– Me er mektig imponerte over Fonnafjord Næringspark og Reco, som har vore hovudentreprenør på ombygginga. Dei har blitt heilt ferdig med lokalet i tide til opninga, og alt har vore på plass. Dét er ikkje vanleg, meiner Raymond Johansen.

– Her har dei hatt god kontroll frå A til Å. Me hadde ein hyggjeleg kveld på jobb, utan stress og uro for opningsdagen, smiler Johansen.

Frå 1. april blir han franchisetakar, og Carl Bruno Bodin blir dagleg leiar framover for butikken med 11 tilsette på Seimsfoss.

Under opningsdagen var det mange som hjelpte til, inkludert Andreas Berge frå Bunnpris på Husnes. Frank Søllesvik, som var til stades under butikkopninga både som Reco-sjef og på vegne av utleigar Fonnafjord Næringspark, la merke til ekstrahjelpa som Bunnpris-kjeda hadde klart å mønstra.

– Det er ei viss familiekjensle i kjeda, syns eg å sjå. Når eg kjem inn her, så ser eg butikksjefen frå Bunnpris i Odda er her for å hjelpa denne butikken opp og i gang. Det verkar til å vera eit godt samarbeid i kjeda, kommenterer Søllesvik.

Han var naturleg nok glad for at ein ny leigetakar var på plass i næringsparken.

– Med dette får me på plass det mangfaldet me har ønska oss. No kjem Odda Plast og startar produksjon her med fire-fem tilsette. Med det har me alt frå psykolog til daglegvare og tømrarar på plass. Stort mangfald og fulle lokale, smiler Søllesvik.

Han er også full av lovord om byggjesaksavdelinga til Kvinnhead kommune og brann og redning.

– Me hadde tilsyn av begge instansar i innspurten. Dei har strenge krav, men var med og fann løysingar. Kvinnherad kommune skal ha det ordentleg, så det er ikkje rom for noko slauring, seier Søllesvik og peikar på trafikkavviklinga og branntryggleiken som dei viktigaste felta det vart stilt krav på.