Is-mannen Åge sluttar av

Annakvar fredag og laurdag har «Norge rundt»-hymnen ljoma over dei fleste krikar, krokar og byggjefelt i Kvinnherad. Det er det sikre teiknet på at «Den norske isbilen» er i anmarsj. Bak rattet har Åge Torstein Askeland frå Tysvær sete. Han har jobba hjå Den norske isbilen i 22 år, og har alltid hatt Kvinnherad som del av rutenettet sitt.

– Men eg har køyrd is i 54 år. Eg byrja i 1968, og dei fyrste åra leverte eg til butikkar, smiler Åge Torstein når Grenda forstyrrar han i Neslia laurdag føremiddag.

Grunnen til at lokalavisa vil snakka med is-mannen, er at vi har fått eit tips om at det er hans aller siste tur. Åge Torstein, som fyller 77 år i januar, stadfestar dette.

– Ja, så no er det på tide å gje seg, seier han.

Åkra til Utåker

På kvar vitjing til Kvinnherad har han hatt eit stramt program.

– Eg byrjar i Åkra på fredagen, og køyrer over fjellet. Så startar eg ved kyrkja i Rosendal og tek til og med Uskedalen. På laurdagen tek eg Neslia og resten av Rosendal, før eg dreg ut til Herøysundet og vidare til Husnes og ut til Utåker, fortel is-mannen som ein periode også hadde Ænes og Mauranger på programmet.

Med seg har han is av merket Isbjørn Is, samt eit utval fiskeprodukt.

– Kva har vore mest populært?

– Det er alt eigentleg. Det er ein veldig populær og god is, opplyser Åge Torstein.

Innbyggjarane her i kommunen har i alle år teke godt imot isbilen. No blir det spesielt at sjåføren ikkje lenger er den same gamle.

– Eg har hatt mange faste og kjekke kundar. Ikkje berre ungar, men vaksne også. I går møtte eg ein i Uskedalen som var så lei seg for at eg skal slutta. Han var heilt ifrå seg, seier Åge Torstein Askeland.

Ein fast rutine har vore å overnatta på Rosendal Fjordhotel frå fredag til laurdag. Men også der har det vore endringar.

– Eg saknar sjefen (Arne) og Inger Johanne, konstaterer stamgjesten.

Bryllaupsdag

På denne siste turen sat kona Lindy May Askeland i passasjersetet. Ho er slett ikkje ukjent med isbilyrket ho heller.

– Kona køyrer på Halsnøy. Ho òg har køyrd i 22 år, smiler ektemannen.

– Det er kjekke folk på Halsnøy. Men det er kjekke folk over alt, seier ho når ho kjem ut av bilen.

Ho påpeikar at Åge Torstein faktisk aldri har vore borte frå jobb nokon gong. Det får mannen til å koma med ei interessant saksopplysning.

– Vi har 45 års bryllaupsdag i dag, smiler han.

– Eg rekna med eg skulle vakna til ein rosebukett i dag, men nei då. Men vi hadde i alle fall ein god middag i går, humrar Lindy May.

Ho slår fast at ektemannen har sett spor etter seg i Kvinnherad.

– Det er rørande å sjå korleis mange tek farvel med han. Dette viser at det ikkje berre handlar om å selja for pengar, ein må selja med hjarta òg, filosoferer ho.

Nesten 100 bilar

Den norske isbilen vart etablert i 1962, for at fleire skulle få smaka Isbjørn Is. I dag har selskapet nesten 100 bilar på vegane, som vitjar så å seia alle kommunane i landet. Sjølv utan Åge Torstein Askeland skal dei køyra til Kvinnherad. Forskjellen vert truleg at sjåføren heretter skal koma frå Bergensavdelinga, ikkje frå Haugesund.

– Det er ikkje lett å overta etter ein som har køyrd i 22 år, dei skal dei få finna ut, trur Åge Torstein.

Folk på Halsnøy kan uansett gle seg over at Lindy May skal fortsetja i ruta der.

– Eg får prøva å halda ut litt til, så kanskje eg får gullklokka, flirer ho.