Involvert i storsatsing i Sandvikvåg

Fleire kvinnheringar er involverte i ei storsatsing på grøn energi og blå vekstnæringar i Sandvikvåg Næringspark.

Etter å ha sikra seg eit vel 150 mål stort areal like aust for Sandvikvåg ferjekai, har Sandvikvåg Næringspark AS no signert intensjonsavtalar med NorSea Group og hydrogenselskapet HYDS om etablering i det nye næringsområdet. NorSea Group er tiltenkt rolla som drivar av industriparken, medan HYDS ynskjer å etablera produksjon av grønt hydrogen.

Øyvind Bjørnevik, konserndirektør for eigedom i NorSea Group, framhevar særleg tre næringar som aktuelle for næringsparken: Olje og gass, havvind og akvakultur. Han peikar på at utsiktene for den norske olje- og gassindustrien er gode, både på kort og lang sikt. Norge har i tillegg ambisjonar om å byggja ut 30 GW havvindkraft innan 2040, og styresmaktene ynskjer ein kraftig vekst i produksjonen til havbruksnæringa innan 2050, der mykje av veksten må skje i form av oppdrett ute til havs og på land.

Viktig tilvekst

– For å realisera alle prosjekta og skapa den ynska veksten i havnæringane, er det eit stort behov for infrastruktur med tilgang til sjø. I dag er det mangel på slike areal i Sunnhordland og langs resten av kysten. Sandvikvåg Næringspark vil derfor utgjera ein viktig tilvekst, gjennom tilgangen til hovudleia til sjøs og E39 på land, kapasiteten til å gjennomføra arealintensive prosjekt, konkurransedyktig seglingsdistanse til havvindområde og olje- og gassfelt, og korte avstandar til ei rekke oppdrettslokasjonar, seier Bjørnevik i ei pressemelding.

HYDS (Hydrogen Solutions) vurderer ulike alternativ for hydrogensatsinga på Sandvikvåg.

– Vi ser på moglegheitene for å etablera både produksjon, lagring og distribusjon av grønt hydrogen. Sandvikvåg er svært godt eigna for distribusjon både til den maritime næringa, industrien, og tungtransporten på land, og vi ser på løysingar for ein energiterminal, kommenterer dagleg leiar Thor Henrik W. Hagen.

Ein estimerer at det nye næringsområdet i fyrste omgang kan skapa mellom 40 og 50 faste arbeidsplassar.

Meir om selskapa

NorSea Group eig ni forsyningsbasar og hamneanlegg i Norge, Danmark og Storbritannia. Selskapet er ein komplett leverandør av hamnetenester, base- og logistikkløysingar til kundar innan olje- og gassindustrien, offentleg verksemd, havbruksnæringa, vindindustrien, og andre maritime næringar.

HYDS jobbar med å utvikla, byggja, eiga og drifta anlegg for produksjon av grønt hydrogen. Selskapet vart etablert i 2021, og har Sunnhordland Kraftlag og Liquiline som eigarar. Deira fyrste anlegg skal koma i drift på Stord i løpet av året.

Sandvikvåg Næringspark AS er 100 prosent eigd av Stord Eiendomsforvaltning AS, som har investorane Kurt Arne Tyse og Erling Prestbø på eigarsida. Selskapet er medeigar i Fonnafjord Næringspark og Sandviklio Næringspark i Kvinnherad.