Inviterer til ungdoms-camp i forkant av Rosendalsveko
Rosendalsveko er i år utvida med ein ungdoms-camp som vil finna stad på Folgefonnsenteret. Ungdomsprogrammet er lagt til helga 7. og 8. august, kor mellom anna studentar vert inviterte til å delta.
Publisert
Ungdoms-campen vert arrangert av studentorganisasjonen «Om i morgen» og «iEarth» i samarbeid med arrangørane av Rosendalsveko. Tematikken for begge desse arrangementa er felles, men Rosendalshelga 2021 vert i større grad lagt opp som ein workshop.
Tema for laurdagen er «Korleis kan vi best utnytte den lange kystlina vår?» På kvelden vert det middag og kåring av ein vinnar frå workshopen. Søndagen er førebels sett av til eit frukostmøte med innlegg frå klimaforskarane Kerim Hestnes Nisancioglu og Renate Nedregård, samt eit rebusløp til Skålafjell. Programmet er lagt opp av Om i morgen.
Annonse
Spår gode utfordringar
– Det vi såg i fjor, var at nokre av dei mest spanande diskusjonane kom når studentar utfordra politikarar, næringsliv og akademikarar. Difor legg vi i år opp til ei helg for studentane i forkant av veka, i samarbeid med studentorganisasjonen Om i morgon, forklarar Kerim Hestnes Nisancioglu frå programkomiteen til Academica Europea Bergen Knowledge Hub (AE-Bergen).
Arrangøren ynskjer at dei som deltek på ungdoms-campen skal sitje att med ny kunnskap og nye idear, samt at dei vert utfordra til å finne løysingar på klimautfordringar.
Det vert også lagt vekt på det sosiale denne helga. Følgjeleg er det sett av tid til å bli kjend med dei andre deltakarane og knyte nettverk.
Annonse
Ynskjer tverrfaglege diskusjonar
Sjølv om studentorganisasjonen vart etablert av studentar frå mat-nat fakultetet ved UiB, har medlemsmassen i dag blitt vesentleg meir tverrfagleg sidan oppstarten i 2019. Organisasjonen har no også medlemmar frå samanliknande politikk, psykologi, juss og økonomi, og det tverrfaglege vert sett på som ein styrke.
– Vi set pris på tverrfaglege diskusjonar – og vil difor invitere unge til å delta uansett studie eller fagfelt, skriv arrangøren på Facebook, kor programmet for ungdoms-campen og lenke til påmeldinga også ligg.
Påmeldingsfristen er 30. juli. Det vil også vera mogleg for alle interesserte å følgja Rosendalsveko på digital strøyming.
