Inviterer til trerettars i Raualøo

Fotballaget samlar inn pengar for å kunne reisa på Norway-cup, og i så høve inviterer dei til ein freistande trerettars middag.

Mannen bak ideen og primus motor for arrangementet er fotballpappa Kurt Helge Dahl. Han fortel at ideen kom i frå eit sakn om mogelegheitar for jentene å gjera dugnad.

– Alt som er dugnad baserer seg på å selja dopapir, noko som det er me foreldre som administrerer. Dei sjølve bidreg ikkje så mykje. Det var difor eg ynskte å få til noko anna, så når eg då er kokk i botn så føreslo eg at me kunne prøva oss på restaurant, fortel Dahl.

– Me lufta ideen for jentene fyrst, og dei stilte seg veldig positive til det. Det er ein litt gøy ting, og noko som gjer at me skil oss litt ut. Men me kunne på ingen måte ha gjort dette utan sponsing og hjelp frå det lokale næringslivet, legg han til.

Fyrstemann til mølla

8. juni kan du altså få deg ein særskild god og appetittvekkjande trerettars middag i Raualøo i Rosendal.

– No gjer jo eg det meste i kulissane, men på sjølve dagen så må jentene koma tidleg på jobb og vera med heile dagen. Me skal ha to bordsete med plass til 25 personar, så blir det to serveringar i løpet av kvelden. Det blir ein travel dag, og jentene skal få gjera ein god innsats, understrekar Dahl.