Inviterer til rusfritt arrangement 16. mai
Ungdomsbasen sør og Nattcaféen på Husnes har gått saman om å arrangere ein kjekk, trygg og rusfri kveld for ungdommane den 16. mai. Arrangørane ser fram til kvelden og håpar mange tar turen.
Publisert
Jan-Ove Fagerheim fortel at dei har hatt nokre gode planleggingsmøter i forkant av kvelden.
– Det har vore kjekt å samarbeide om eit felles arrangement denne kvelden, i staden for å ha to opplegg som kan opplevast konkurrerande. Både dei og me stiller med fleire vaksne, og det er meldt strålande vêr, seier han.
Annonse
Varierte aktivitetar, ute og inne
Uteområdet ved Nattcaféen vil vonleg yra med liv.
– Me flyttar kiosksalet ut, og det blir grilling og forskjellige konkurransar ute. Jo meir me prata om det, jo meir verkar dette som ein ideell plass å vera. I tillegg blir det mykje aktivitet inne, med biljard og playstation, kahoot og meir, legg han til.
Sjølv om dei har samarbeidd tidlegare, er ombygginga av Ungdomsbasen sør ein av grunnane til at arrangementet er lagt til nattkafeen sine lokale.
Annonse
– Det blir mange forskjellige aktivitetar og konkurransar. Mellom anna lagar me i stand ein slags «Mesternes mester» med ulike oppgåver og hinder. Det blir bingo, og konkurransar som å gjetta kor mange non-stop det er i krukka, det blir dart og Ball i trall, der ungdommane skal halda fem ballar i rørsle lengst mogleg, fortel Arve Rødland frå Ungdomsbasen, og legg til at ungdommane får eit klippekort med bonusar jo fleire aktivitetar dei deltek på.
Gratis grillmat
Rødland presiserer også at foreldre som er usikre på kva det vil dreia seg om gjerne må ta kontakt.
– Og så er det greitt å poengtere at ungdommane får gratis grillmat, det skal ikkje kosta noko å bli med, understrekar han.
Målet er å lage eit kjekt arrangement som vil gje ungdommane som ikkje ynskjer å drikka denne kvelden eit gyldig argument for å velja vekk fest.
Det rusfrie arrangementet startar klokka 18 og varar til 23 på kvelden. Rødland oppmodar føresette til å bringe og hente ungdommane sine.
