Inviterer til romjulscup i Husneshallen

Etter eit års fråvær er det igjen klart for elegante finter, tøffe duellar og lekre scoringar i Husneshallen i romjula.

Som så mange andre av fjorårets arrangement, glimra også den tradisjonsrike romjulscupen til Trio med sitt fråvær i fjor. Men i år skal A-laget til Trio gjera sitt for at cupen vert arrangert.

– Vi satsar på å få det til, og utgangspunktet er at det blir romjulscup. Så skal vi sjølvsagt følgja med på smittesituasjonen lokalt og sjå korleis ting er når det nærmar seg, seier Trio-trenar Tore Olderkjær.

Det betyr at det i år vert mogleg for kvinnheringane å springa av seg pinnekjøtmiddagen i Husneshallen andre juledag, men då berre andre juledag. For i motsetnad til dei andre åra, skal årets fotballcup startast og avgjerast på ein og same dag.

– Det er det fleire grunnar til, men vi har tru på at vi skal få det til likevel. Det vert sjølvsagt meir intensivt, men om vi vert like mange lag som det tradisjonelt har vore, så skal det gå veldig bra å få dette til frå klokka åtte morgonen til åtte på kvelden, seier Olderkjær.

– Bli med

Som vanleg vert det ein eigen dame- og herreklasse. Og dei kjende reglane med maks ti spelarar på kvart lag, og maks to aktive på banen samstundes gjeld.

– Men vi har gjort det slik at dei som har spelt for samarbeidslaget i 7. divisjon ikkje blir rekna som aktive, seier Olderkjær.

På den måten håpar dei å få fleire med. Trio-kaptein Eivind Tufta Saghaug håpar at folk no vil samla kameratgjengen og kasta seg med andre juledag.

– Jo fleire vi er, jo kjekkare bli det. Så det er berre til å samla saman gjengen og melda seg med, seier Saghaug.

Men har du symptom på sjukdom, ynskjer ikkje arrangørane å ha deg inn i Husneshallen.

– Vi ynskjer at alle skal føla seg trygge på arrangementet, så vi oppmodar sterkt at om ein kjenner noko symptom på sjukdom, så held ein seg heime, skriv IL Trio i ein invitasjon.