Inviterer til premiere
Brit Landa har hatt mange søvnlause netter i forkant av premieren av kortfilmen «800 001», mellom anna grunna bekymringar i samband med smittevern. Paradoksalt nok høver dette godt, då pandemien dannar eit bakteppe for filmen som skal visast.
Publisert
Sist oppdatert
Fokuset i filmen ligg på påkjenninga, utfordringane og tapet som mange kjende på under nedstenginga av samfunnet grunna Covid-19. Tittelen, «800 001», peikar mot statistikk som viser at stadig fleire slit med psykiske utfordringar.
Sjølv om formatet Landa jobbar i er kortfilm, utnyttar ho dei få minuttane til å stille spørsmål rundt denne tematikken. Til dømes utforskar ho korleis me menneske sjølv har vore skuldige til å skapa eit samfunn med veksande einsemd.
Annonse
– Me lever i ei teknologisk verd, men gjennom pandemien har det kjendest som eit stort tap når me ikkje lenger kunne gi klem eller kyss, men måtte kommunisera digitalt. Me godtar teknologien så lenge det er vårt eige val, men ikkje når me blir tvungne til det, seier ho.
Meir enn film
Halsnøyjenta set stor pris på å kunne nytta klosterområdet til premieren, og har hatt ein ambisjon om å sy saman eit program som gir ein tydeleg heilskap.
– Eg vil tilby noko meir enn berre filmen når folk først tar seg tid til å kome, for den varar jo berre i 12 minutt. Men eg har laga meg veldig mykje arbeid på den måten, så nattesøvn driv eg ikkje med lenger, fortel den prisvinnande filmskaparen.
Annonse
Heldigvis har ho eit godt støtteapparat i ryggen, og nemner både Helen Petersen, venelaget for Halsnøy kloster og familien i denne venda.
– Dugnadsånda her er heilt fenomenal. Noko slikt hadde eg aldri fått til i Oslo, slår ho fast.
Speglar tida me er i
«Noko slikt» tyder i denne samanhengen å sy i hop ein skreddarsydd premiere, kor gjestene er fordelt på fleire grupper og mykje av programmet vil skje parallelt. Dette har med maks-grenser på gruppestorleikar å gjere, og sjølv om ordtaket seier at ein ikkje kan gjera alle til lags, verkar det som at det er nettopp dette Landa siktar mot.
– Når eg har valt å dele publikum inn i små grupper er det også med å spegle tida me er i. I første del av arrangementet startar den eine gruppa her inne, og den andre nede i gruva. I del to vert alle samla på området her ute, der ein kan ha den avstanden som krevst, fortel Landa frå benken utanføre vestfløyen i klosterhagen.
Publikum vil bli guida mellom dei ulike stadene som scenekunsten utfaldar seg, og på menyen står både framføring av monologar, dans og sjølvsagt filmvising. Det er også open kafe i hovudhuset, og forhåpentlegvis vil det heile opplevast som ein allsidig kveld.
Annonse
– Eg er sjølv med i den avsluttande scena, men elles kjem eg nok til å gå rundt med ganske høge skuldre og passe på at alt går som det skal, medgir ho med antyding til bekymring i stemma.
Bekymringa heng tett i hop med logistikken, men er også forankra i den kunstnarlege tvilen: Blir det for sært? Vil det koma folk?
– Eg freistar å sei til meg sjølv det eg seier til skodespelarane eg jobbar med: Du må våga å stole på deg sjølv, avsluttar ho.
Oppdatering onsdag, 22.09, kl. 19:14.
Kortfilmen «800 001» har nettopp vunne sin andre pris; Award of Merit: Contemporary Issues / Awareness Raising ved Best Shorts Competition i La Jolla California.
Grenda gratulerer!
