Inviterer til open brannstasjon

Den nye hovudstasjonen på Husnes vert opna for publikum når Brannvernveka skal markerast.

Kvart år blir «Brannvernveka» arrangert i veke 38, og Kvinnherad Brann og redning har lagt årets opne dag, laurdag 24. september, til hovudstasjonen på Husnes.

– Endeleg kan publikum bli invitert til open dag på brannstasjon igjen. Etter to spesielle år, kor heller ikkje brannvernveka har vore som normal, håpar me at oppslutninga i år blir stor, skriv dei på Facebook-sida si.

At brannvernveka blir arrangert på hausten er ikkje tilfeldig.

– Då går vi inn i den årstida der talet på bustadbrannar vanlegvis aukar. Folk treng ei påminng om branntryggleik før me skrur på varme og belysning, tenner levande lys og fyrer i omnen, skriv dei.

Kvinnherad brann og redning ynskjer publikum hjarteleg velkommen.