Inviterer til minimarknad
Kunstverkstaden i Rosendal opner dørene for publikum kvar laurdag fram mot jul, og vonar bygdefolket ønskjer å ta turen innom.
Publisert
Sist oppdatert
Det er få dagar til minimarknaden opnar, og den tar i år ei nedtona form. Dei lokale kunstnarane Sølvy Johansson og Karin Bøe er trygge på at dei skal klare å halde ope trass i smitteutbrotet, og håpar publikum blir med på å halde avstand og gjere marknaden til ein fin førjulsoppleving.
– Vi har nok berre følt oss litt fram på smitteverntiltaka, men vi haldt jo ope kvar laurdag gjennom heile sommaren òg, og det gjekk fint. Det blir handsprit ved begge inngangsdørene, og vi held ope i heile etasjen her, seier Karin.
Annonse
Det blir ingen eiga opning av marknaden, då det ifølgje Karin ikkje er «rom for noko samanstimling av folk no». Ho informerer vidare om at det blir eit breitt utval av kunstverk å kjøpe, til dømes bøker, måleri, tekstilbilete, smykke, vesker, trefigurar og strikk.
Dei som held til i Guddalshuset om dagen er, forutan Karin og Sølvy, Kristin Schulerud, Åslaug Snilstveit, Elisabeth Croles. Til saman står dei for ei god blanding av brukskunst, bøker, abstrakte og figurative kunstverk.
Mykje av det som vert å sjå under minimarknaden er laga av kvinnene som har verkstadane sine i Guddalshuset, men utstillinga blir også krydra av arbeida til tre gjestekunstnarar; Kjell Musland, Dagrunn Vaage og Inger Marie Oma.
– Eg har allereie sikra meg to av nissane til Kjell, han må jo ha spikka i heile 2021, smiler Sølvy, og peikar mot benkene kor Kjell Musland sine trefigurar står på rekkje og rad.
Annonse
– Det vi håpar på no er at bygdefolket trør over dørstokken og kjem inn. Dei er veldig velkomen her, slår ho fast.
