Inviterer til kamp mot ungt utanforskap

Nav sitt Oppsøkande team består av Emma Reigstad og Martin Måkestad. I rundt halvanna år har dei jobba for å hjelpa unge kvinnheringar mellom 16-24 år tilbake i jobb, skule eller anna sysselsetting. No ynskte dei å få ein større del av næringslivet i Kvinnherad med på laget.

– Fyrst vil eg berre sei at me er allereie veldig nøgde med kor imøtekomande og gode næringslivet her i Kvinnherad allereie er når det kjem til å ta i mot desse ungdomane. Så det er absolutt ikkje difor de har blitt kalla inn hit i dag, smiler Reigstad, til god latter frå dei frammøtte.

– Tala frå 2021 syner at kring 50 ungdommar står utan arbeid eller skule. Me har allereie hjelpt over 30, men det me er redde for er tala som kjem i åra framover no etter korona. Me fryktar at dei vil syna at fleire har dutte utanfor, fortset Reigstad.

Lågare terskel

Målet til teamet er å få fleire instansar og lokale bedrifter med på laget, slik at fleire er med i dialogen og saman kan finna gode løysingar og måtar og samarbeida på.

Tematikken på samlinga vart teke på alvor og praten, diskusjonane og idemyldringa flaut fint blant gruppene. Dei tok for seg ting dei allereie var gode på, fann fram til ting dei kunne bli betre på og diskuterte seg fram til både årsaker og mogelege løysingar.

– Ei av bonusane med denne samlinga er jo at fleire bedrifter og instansar no kjenner betre til kvarandre og kjenner betre til korleis me jobbar. Det har vonleg god effekt berre det, samtidig er samlinga i dag med på gjera fleire meir bevisste rundt dette, seier NAV-kollega og Marknadsansvarleg Chris-André Elvik.

Ei av dei som hadde teke seg tid til å delta på samlinga var dagleg leiar for Kvinnherad Breiband Gunnhild N. Hillestad.

– Kvifor valde du å bli med på samlinga her i dag?

– Fyrst og fremst så ringte dei meg på førehand, der dei fortalde om arbeidet sitt og prosjektet dei held på med, noko eg absolutt meiner er ein fordel. Då vart det nok ein del lettare å engasjera seg. I tillegg er dette noko me ynskjer å auka kunnskapen vår om, og ikkje minst bli kjend med korleis dei arbeider. Då blir ikkje terskelen for å ta inn folk for høg, fortel Hillestad.

Ein annan deltakar som også var svært engasjert for tematikken var dagleg leiar for Rødsten bilforretning Vegard G. Jegtevik.

– Eg har alltid vore veldig oppteke av at alle skal inkluderast. Alle må få ein sjanse, og me i arbeidslivet må ta ansvar for å hjelpa dei unge ut i livet. Det er viktig både no og framover uavhengig av kva bransje ein er i, utfordringane er felles likevel, fortel Jegtevik engasjert.

– Det er mange ungdomar som kanskje er skulelei, men som likevel er både motiverte og kompetente til å jobba. Dette er det viktig å ta tak i før det går for langt. Problemet er at jo lenger tid dei er i utanforskapen, dess vanskelegare er det å koma inn att i arbeidslivet eller på skulebenken, fortset han.

Lite verd

På spørsmål om kva dei tenkjer om dagens samling smiler Reigstad nøgd.

– Me er absolutt nøgde med oppmøte, og me er også svært takksame for at dei prioriterer dette. Me opplev at næringslivet gjerne vil gje desse ungdomane ei god oppleving, men dei har også gitt uttrykk for at dei har behov for å snakka om dette og at dei kjenner seg usikre på om dei har god nok kompetanse til å ta dei i mot, fortel Reigstad.

– Samtidig kjenner også ungdomane på både usikkerheit og utilstrekkelegheit i møte med dei lange listene av krav i stillingsutlysingane. Noko eg kan forstå veldig godt, fortset ho.

Reigstad fortel vidare at det er blitt gjort mykje forsking på det ho kallar «NEET-gruppa», som er engelsk og står for «Not in Education, Employment or Training». Eller på godt norsk, «Ikkje i utdanning, arbeid eller opplæring».

– Dette er ei problemstilling som er veldig kompleks og samansett, men ofte så er det ikkje noko rus inne i bilete i fyrste omgang. Ungdomane går rundt og kjenner seg lite verd i kvardagen. Då er det viktig at nokon ser dei, og me strekk oss veldig langt for å sjå desse ungdomane. I tillegg syner alle bedriftene som er her i dag at dei også ynskjer å sjå dei, avsluttar Reigstad.