Inviterer til innspelsmøte om ferjene
I januar inviterer Skyss alle aktuelle kommunar til innspelsmøte i samband med dei nye ferjekontraktane frå 2030.
Publisert
Sist oppdatert
Skyss har allereie starta førebuingar til utlysing av nye ferjekontrakter for 18 av ferjesambanda i Vestland. Oppstart av kontraktane er ikkje før i januar 2030.
«Ei fyrste sak om komande kontraktar skal handsamast i fylkesutvalet medio 2025 for å gjera strategiske vegval og gje føringar for vidare arbeid. Avgjerd om å lyse ut konkurransen vil etter planen fattast av fylkesutvalet i 2026. Skyss tek sikte på å lysa ut konkurransen våren 2026, etter politisk vedtak», står det i eit brev frå Skyss til ferjekommunane.
Annonse
Til førebuingane ynskjer Skyss no kommunane sine innspel til det framtidige ferjetilbodet. Difor inviterer dei til innspelsmøte med kommunar som har ferjesamband, samt aktuelle nabokommunar. Eventuell endringar er i utgangspunktet planlagt frå oppstart av nye kontraktar i 2030.
Viktigaste innspela
Skyss ber om tilbakemelding på om kommunen vil stille i møte, kven som deltek og om tidspunktet passar. Strekningane Ranavik-Skjersholmane og Gjermundshamn-Varaldsøy-Årsnes står på programmet den 27. januar. Dagen etter står mellom anna Jondal-Tørvikbygd og Kvanndal-Utne på menyen. Den 29. januar er det klart for Fjelbergruta og Utåker-Matre-Skånevik.
«Innspela frå kommunane i denne første runden vil bli teke inn i vidare utgreiing i Skyss. Ei tilråding vil bli lagt fram til politisk behandling i fylkeskommunen. Vedtak i saka vil gje føringar til kva Skyss skal jobba vidare med inn i konkretiseringa av dei nye kontraktane», heiter det.
