Inviterer til innebandy, konsert og føredrag om mobbing og psykisk helse

Nattcupen er eit kristent, rustfritt arrangement for ungdomar frå 8. klasse og oppover.

«Husnes kyrkjekontor har arrangert innebandyturneringar i mange år. I byrjinga var cupen lagt inn som ein del av det obligatoriske konfirmantopplegget. Seinare har det vore eit frivillig tilbod både til konfirmantar og andre ungdommar. I fjor var nærare 300 ungdommar innom arrangementet. På det meste har cirka 30 lag stilt i sjølve turneringa, og det er stor stemning både på banane, på tribunane og i nattkafeen», opplyser KRIK Husnes ved Jan-Ove Fagerheim i ei pressemelding.

I år vert det besøk av artisten GinoBless (Jan Erik Mæland) saman med Arnar Vuolab Jørgensen. Dei to vil ha ei blanding av mini-konsert og føredrag om mobbing og psykisk helse.

«Bli med på ei gripande reise med Arnar, ein ekte hjartekrigar og ei stemme for håp i kampen mot mobbing og livet med PTSD», heiter det i presseomtalen. Arnar ber med seg ei sterk historie som gjer inntrykk, og har mellom anna vore med i ein dokumentar på NRK Brennpunkt.

Ikkje ei sovepute

Som alltid vert det lagt stor vekt på det sosiale rundt sjølve turneringa på ein Nattcup.

I innebandy-turneringa vert det konkurrert i tre klassar; éin rein jenteklasse og to aldersbestemte klassar der det kan vera både gutelag, jentelag eller miksa lag (8.-10. klasse og 1. vg og oppover).

«Sjølv om Nattcupen er eit 100 % rusfritt arrangement i kristen regi, ynskjer vi ikkje at dette skal vera ei slags sovepute for foreldre og føresette. Ta gjerne turen oppom Husneshallen i løpet av kvelden. Arrangementet er ope for alle. Sørg for at din ungdom ikkje diskvalifiserer seg sjølv frå å koma inn på det rusfrie arrangementet», oppmodar arrangøren, som ynskjer at Nattcupen og alle aktivitetane rundt skal vera ein stor motivasjon for ungdommane til å halda seg rusfrie denne kvelden.