Inviterer til informasjonskveld: Korleis søke midlar til prosjekt?
Frivilligsentralen og SpareBank 1-Stiftinga Kvinnherad har no gått saman om å styrka frivilligheita. Dette ved å tilby rettleiing til frivillige, lag og organisasjonar om korleis ein søkjer midlar frå Stiftinga.
Publisert
Sist oppdatert
Førstkomande måndag, altså 14. februar, inviterer dei til informasjonskveld og orientering om korleis ein skal søkje, samt om kva som må dokumenterast for å få innvilga støtte gjennom stiftinga.
«Søknadsportalen i Kvinnheradstiftinga er open og me hiv oss rundt og inviterer difor inn til ei kjapp innføring i kva du bør ha med i ein søknad. Det gir deg sjølvsagt ingen garanti på å få innvilga stønad, men du er iallefall betre rusta til å skrive søknad til Stiftinga. (Og mogleg andre plassar.)» heiter det i arrangementsinformasjonen på Friskus.
Annonse
Ynskjer ei blomstrande frivilligheit
Veronica Thorsen frå Kvinnherad frivilligsentral har tatt initiativ til informasjonskvelden då enkelte tykkjer det er vanskeleg å søke, og dette er noko dei ofte hjelper lag og organisasjonar med.
For at fleire skal bli trygge på kva som krevst for å skrive ein god søknad om finansiering til sine prosjekt, er ho difor glad for at Kvinnheradstiftinga ville vera med, sjølv på kort varsel.
– Frå vår side blir det å hjelpe dei som treng det med å få på plass det som trengs for å i heile tatt kunne søka, som til dømes å registrere seg i Brønnøysundregisteret og få organisasjonsnummer, fortel Veronica Thorsen.
Annonse
Dagleg leiar i SpareBank 1-Stiftinga Kvinnherad, Bente Lie Nilsen, utdjupar kva dei vil bidra med på måndag.
– Stiftinga vil komma med informasjon og veiledning om søknadsprosessen og svarar på spørsmål undervegs.
Orienteringa vil finna stad på Husnes, i festsalen på Kulturhuset. Vonleg vil mange ta turen, slik at frivilligheita i Kvinnherad «skal blomstre og at samfunnet skal bli nokolunde som det var.»
