Inviterer til heilaftan i Nyasago: «Når livet snur»
Det byrja med ein laus ide om å villa stella i stand eit arrangement i Nyasago i Gurinefjøro. 3. mai opnar den nye storstova med kulturelt og sosialt påfyll. Eller med Bente Haugen sine ord: Ein salig lapskaus!
Publisert
Sist oppdatert
– Me tenkte det ville vera kjekt å gjera noko no når samfunnet har opna opp att, rett og slett få litt påfyll. Me byrja tenke på kven me kunne invitera, og då datt det namnet ned, fortel Astri Skaaluren Måkestad, Bente Haugen og Marianne Hovda Gausvik, som sit i arrangementskomiteen som representantar for Omvikdalen bygdekvinnelag og Rosendal Helselag.
Namnet som datt ned var Marit Elisebet Totland. Og ho var positiv til å stilla straks spørsmålet kom.
Annonse
Basar med Gurine sine årer
No kan såleis folk byrja å gle seg til 3. mai, for då kjem Marit Totland til Rosendal for å ha salsutstilling og foredrag. Dette blir det aller første arrangementet i den ny-renoverte Nyasago i Gurinefjøro.
I tillegg til salsutstilling og foredrag blir det ei kort orientering om Nyasago, før det er klart for matøkt og åresal.
– Me har fått låna Gurine sine årer, fortel Bente med begeistring i stemma.
Annonse
– Det er ekstra store årer det då? undrar bladfyken, men får stadfesta at dei er temmeleg vanlege basarårer, men sjølvsagt av tre.
Kven er eg når livet snur?
Programmet meiner arrangørane er av den inspirerande sorten. Då dei hadde landa på Marit Totland, var vegen kort til atelieret hennar på Valen.
– Me drog på besøk, og der oppsto det ein veldig fin og inspirerande samtale. Me hadde ikkje tenkt ut noko tema, men visste jo at Marit har ein mangfaldig bakgrunn, og at ho er ein god foredragshaldar, fortel Astri.
Marianne held fram:
– Ho kunne velja sjølv kva ho ville snakka om, og då vart det dette: «Når livet snur, korleis taklar me det? Har me nokre val? Og om alt endrar seg i livet mitt, kven er eg då?»
Annonse
Kontroll på eige fokus
Arrangørane er særleg begeistra for den positive vinklinga Marit har på tematikken.
– Eg er så imponert over energien til den dama. Ho har verkeleg løyst livet til sin fordel! Seier Bente.
– Tenker iallfall vi, supplerer Astri, og legg til at dei fleste møter ulike utfordringar gjennom livet, og understrekar kor viktig det er å ikkje koste utfordringar under teppet.
– Det er så lett å snakke om det som er lett, men når ein går i det tyngste er det lett å tenka negativt. Å stå i ei endring treng ikkje vera negativt, men ein kan ta kontroll på det ein vil setje fokus på i ein slik situasjon, meiner ho.
Arrangørane meiner kvelden vil vera til hjelp og inspirasjon for mange, og håpar at dei som tek turen vil gå oppløfta der frå.
Annonse
– Det kan vonleg bli ei spire til noko, seier Marianne, som også informerer om at det vil bli opna opp for spørsmål frå publikum i samband med foredraget.
Alle skal få ein stol
Arrangementet er ope for alle og har gratis inngong. Inititativtakarane understrekar at dette høve like godt for folk i alle kjønn og aldrar.
Det er god sitjeplass ved borda til om lag 70 menneske i det lokalet som i seg sjølv kan lokka med historiesus i kvar bjelke, men det er mange fleire stolar tilgjengeleg dersom det kjem fleire.
– INGEN blir avviste i døra, alle som kjem skal få ein stol. Kjem det mange, opnar me berre opp her, seier Bente og slår ut armane.
Armane er like vidopne som dei store dobbeldørene i enden av Nyasago.
