Inviterer til friluftsgudsteneste
Fyrstkomande sundag kan du få med deg både friluftsgudsteneste og fellestur i Åkra.
Friluftsgudstenesta finn stad på Øvre Fatland og preika blir heldt av Carsten Mrusek. I samband med gudstenesta vert det også arrangert to fellesturar.
– Det er bilveg heilt fram, men det er også mogeleg å få skyss dersom nokon har behov for det, fortel Lars Emil Berge frå Åkra bygdalag i ei pressemelding.
Annonse
Fint vêr og mat
– Den eine turen startar frå Hillesdalskleiva. Denne turen er ein grei tur for dei fleste, men har ein del stigning. Her blir Bjørn Rune Bergane turleiar. Den andre turen går frå Løkjene. Dette er ein lett tur, og her er det Kristin Skromme som er turleiar, forklarer Berge vidare.
Åkra bygdalag ynskjer alle velkomen og håpar på fint vêr.
– Hugs å ta med niste og noko å drikka til kyrkjekaffien, og dersom det blir regn denne dagen vert det gudstenesta halden i kyrkja i Åkra, avsluttar Berge.
