Inviterer til fredagstaco

– Det blir både klatring, rulleskøytedisko, turnrommet skal vera ope, i tillegg til at det blir ulike ballspel ein kan prøva. Så blir det sjølvsagt også servering av taco, som Frivilligsentralen saman med fjorten ungdomar frå ungdomsskulen skal laga i stand, og det er Bua som stiller med rulleskøyter til rulleskøytediskoen, seier avdelingsleiar for eininga barn og familie Vigdis Gammelsæther.

– Dette blir ein forsmak på det me håpar å få til frå hausten av, då gjerne ein sundag i månaden kanskje. Men no skal me fyrst ha ei slags testkøyring for å sjå kva me treng og slikt, fortset ho.

Tilbodet har blitt til gjennom eit tett samarbeid mellom Kvinnherad Arena, Eininga barn og familie, det kommunale foreldreutvalet, Bua, Frivilligsentralen og valfaget Innsats for andre på ungdomsskulane.

– Dette er eit tiltak som blir gjort for at me kan bruka denne fantastiske storstova me har i kommunen, og så ynskjer me å laga til ein uformell møteplass for familiar og ungdomar. Me har som ambisjon om ha fleire slike lavterskeltilbod, og at arenaen skal vera ein open møteplass, fortset ho.

– Eg trur dette blir veldig kjekt, og me håpar at mange vil ta turen. Arrangementet er kanskje hovudsakleg retta mot ungdomar og barnefamiliar, men besteforeldre er hjarteleg velkomne dei òg, avsluttar ho.