Inviterer til føredrag og workshop med «Pølsa»: - Me ynskjer å gje frivilligheita både påfyll og inspirasjon til vidare arbeid

i år er det frivilligheitas år, og det ynska Kvinnherad frivilligsentral å markera på skikkeleg vis.

– Etter nokre tunge år med covid er det mange som treng påfyll i kvardagen, og etter å ha høyrt med folk om kva dei ynska seg, fall valet på eit gratis motivasjonsføredrag med Øystein Pettersen. Me håpar at dette er eit føredrag som kan gje frivillige i Kvinnherad både påfyll og inspirasjon til vidare arbeid. Øystein er ein mann som har ein veldig fin tankegang, som folk kjennar til og som eg trur har det som skal til for å motivera. Dette blir veldig gøy!, seier Veronica T. Thorsen i Kvinnherad frivilligsentral.

Trass i at det enno er to veker til føredraget, kan Thorsen fortelja om eit stort engasjement rundt arrangementet.

– Nærare 200 seter vart reservert på under ei veke, og det er jo fantastisk kjekt, smiler ho.

Todelt arrangement

Arrangementet denne dagen vil bli todelt. Etter føredraget inviterer frivilligsentralen alle lag og organisasjonar til ein kombinert dialogkonferanse og festmiddag i Festsalen. I tillegg til å halda føredrag skal Øystein Pettersen vera konferansier for kvelden.

– Frivilligheita har og er framleis under eit stort press, og som på ingen måte har blitt betre etter koronapandemien. Staten har no valt å satsa, og då tenkjer me at kva er vel betre enn å laga til ei slik gåvepakke til frivilligheita, seier Thorsen og held fram.

– På dialogkonferansen kjem ordførar Hilde Enstad og administrasjonen frå kommunen. Me har også utfordra politikarane til å vera med. Me prøver å få til eit lydhøyrt møte, der det blir spørsmål og oppgåver, mingling og god mat. Målet er å kartlegga kva utfordringar frivilligheita står ovanfor etter koronapandemien, og deretter drøfta korleis me skal løysa dei og kva Kvinnherad kommune kan bidra med.

Innspel til frivilligplan

Dialogkonferansen vil vera nyttig i kommunen sitt vidare arbeid med frivilligplan.

– Ein plan for frivilligheita skal jo vera av og for frivilligheita. Eg håpar difor lag og organisasjonar kjem på konferansen, for det er nemleg her ein kan koma med innspel og setja fingeren på kva ein treng. I tillegg til innspela som kjem fram på konferansen, vil me i planen nytta oss av ei referansegruppe som er samansett breitt frå heile kommunen, som mellom anna helselag, 4H, Festidalen og turlag, fortel Thorsen.