Inviterer til Fjelbergstemnet

Med unnatak av to år med korona, har det i vel 40 år vore misjonsstemne på Fjelberg i samarbeid med Misjonsalliansen, ein organisasjon grunnlagt i 1901, og som driv diakonale misjons- og utviklingsprosjekt i Bolivia, Ecuador, Brasil, Liberia, Sierra Leone, Kambodsja, Filippinene, Vietnam og Kina.

– Misjonsalliansen sin fyrste utsending, Ludvig Eriksen, budde i prestegarden på Fjelberg nokre månadar på 1880-talet. Opphaldet her vart svært viktig. Eriksen fekk nye krefter og hjelp til å finna livsvegen vidare, skriv prost i Sunnhordland Svein Arne Theodorsen i ei pressemelding i samband med stemnet.

Han vert talar under ettermiddagsmøtet i kyrkja, medan gudstenesta vert leia av sokneprest Carsten Mrusek. Mannskoret «Lovsongsbrørne» frå Stord syng både på gudstenesta og ettermiddagsmøtet. Både på gudstenesta og ettermiddagsmøtet vert det høve til å gje misjonsoffer til Misjonsalliansen.

Det går ferje frå Utbjoa, Sydnes og Borgundøy med retur etter stemnet. Frå Leirvik er det sett opp ekstraskyss.