Inviterer til ein ny Gurinebasar

– Me fylgjer tradisjonen med tid til drøs og kaffi, kaker, pølser og is før programmet startar. Då vert det musikalske innslag både med B-laget og Vivian Brede med band. I tillegg vil også ein toradartrio sørgje for høveleg musikk til åresalet, fortel Kjartan Bjorøy frå Interesselaget for Gurine i ei pressemelding.

Jonsokbål

Bjorøy understrekar også at dei kjem til å setja opp telt ute, grunna dei utrygge vêrmeldingane.

– Det er meldt rimeleg bra vêr, men med risiko for byger. Difor set me opp telt slik at folk kan sitja uner tak. Viss ikkje så er det gjerne ein flokk med folk som plutseleg berre spring. Fordelen er at det ikkje blir noko støvplage, og det er også meldt ganske stille med vind. Kanskje me får tent jonsokbålet i år? seier han håpefullt.

Vidare uttrykkjer han stor takksemd for all støtta som Gurine får frå både folket og næringslivet i Kvinnherad.

– Støtta i både næringslivet og blant private er enormt stor, og det føler me på. Det er Kvinnherad sin båt. Mange av dei lokale bedriftene som støttar oss på ulikt vis vil ikkje ha merksemd eller ekstra reklame. Og dei som kjem for å spela gjer det også på dugnad, seier Bjorøy.

– Når støtta er så stor over alt, då er det kjekt å driva med basar. Det er grådig gøy eigentleg, og kanskje spesielt for meg som er tilflyttar som har kome hit og får sjå all støtta som Gurine har. Gurine lever blant folket på same måte som ho har gjort heile tida, avsluttar han.