Inviterer til bruktmarknad

Det er Liv Astrid Myhre i Uskedal Utvikling som er kontaktperson for bruktmarknaden. Ho vil sjølv vera til stades denne dagen, og stå for sal av kaffi, saft og kaker.

Tre dagar før marknaden er tenkt er det enno svært labert med påmelde seljarar, men Myhre håpar likevel at det blir noko av.

– Second hand er jo veldig i tida. Og det er dessutan tida for at ungane får seg nye ski, så det er høgaktuelt med sportsutstyr og sånne ting. Samstundes er det veldig lett å stelle noko slikt i stand, og ein kan til dømes enkelt betale med Vipps. Så eg håpar jo enno på at folk vil stille opp, seier ho.

Marknaden er tenkt organisert slik at dei som har noko å selja kjøper seg ein stand, der ein sjølv kan selje varene ein har.

– Alt av interesse. Klede, sko, sportsutstyr, interiør, handarbeid. Her er det berre fantasien som set grenser, og det er du sjølv som bestemmer kva du vil selje og kva pris du vil ha, informerer arrangøren på Facebook.

Pengane som kjem inn på kjøp av salsplass vil gå til Uskedalen utvikling.

– Håpar mange vil vera med og gjera dette til eit knakande godt marknad, inviterer Liv Astrid Myhre.