Inviterer til Akan-seminar: Vil setja leiarar i stand til å ta den nødvendige samtalen

Førebels er 20 bedrifter inviterte med til seminaret, men arrangørane slår fast at det er berre for andre å hengja seg på 19. og 20 april.

– Dette er like viktig for dei som er små, men som ikkje har like store høve til å bruka eige personell på slikt arbeid. Alle kan nytta seg av Akan sitt kompetansesenter, Tor Thorsen og Christian Nupen frå Akan på Hydro Husnes og Gunhild Kvåle og Siri Rusten frå Akan i Kvinnherad kommune.

Avhengigheit

Formålet med seminaret er å læra om Akan-modellen, om korleis ein kan tilnærma seg ei bekymringsmelding og kunne ta ein samtale om bekymringa.

– Dei aller fleste som har eit problem med avhengigheit er ikkje dei som sit i ein park og rusar seg, eller uføre som sitt heime og spelar pengespel eller gamar. Dei fleste av dei med slike problem er tilsette i norsk arbeidsliv, slår Tor Thorsen fast.

Han har over 13 år bak seg som Akan-kontakt, og har etter kvart danna seg eit breitt bilete over dei ulike problemstillingane knytt til avhengigheit.

– Akan jobbar opp mot dei som er avhengige av alkohol, narkotika, medikament, doping og spel. Avhengigheit er vanskeleg for den som er avhengig, som ofte slit med skam og stigma, men det er også krevjande for familie, venner og arbeidsgjevarar, utdjupar Thorsen saman med Nupen, Rusten og Kvåle.

Jobben viktig

Der ein tidlegare gjerne var fokuserte på indikatorar som lukt (alkohol) eller pupillar (narkotika), er det no endring i åtferd ein ser etter for å oppdaga om nokon er avhengige. Og skal ein

– Me ser at arbeidsplassen ofte er den beste staden å driva hjelpearbeid. Jobben er haldepunktet i livet for mange, og der har ein støtte rundt dei. Det er ein unik setting for å ta tak i problem, då jobben er ein viktig motivasjon for å koma seg ut av avhengigheita, er Thorsen og Rusten samde om.

– Kurset er for å setja leiarar i stand til å ta samtalen med arbeidstakarar, men det er også med på å visa at ein tar dette på alvor, påpeikar Gunnhild Kvåle frå Akan Kvinnherad kommune.

Tar vare på folk

Gruppa er tydelege på at det er eit stor ønske om å halda den einskilde i arbeid.

– For bedrifta er det eit økonomisk insentiv å halda, og det er stor interesse for å halda på arbeidstakarane. I tillegg er det godt for omdømmet til bedrifta å visa at ein tar var på folk, meiner Nupen, Kvåle, Rusten og Thorsen.

Thorsen fortel at Hydro Husnes for tida har færre Akan-saker enn dei etter statistikken skulle. Samstundes er Hydro-konsernet kjent for å ha eit godt system for å fanga opp og ta seg av tilsette som er avhengige.

– Me opplever sjeldan at arbeidstakarane sjølve melder seg. Langt oftare er det ektefelle og sambuarar som tar kontakt på deira vegne, seier Thorsen om sine erfaringar.

Kurset dei skipar 19. og 20. april har Jarle Wangen frå Akan kompetansesenter, fagleiar førebygging ved Kvinnherad politidistriktstasjon Are Uppheim og Johanna Stueland Bjørkavåg frå Blå Kors klinikk Haugaland som innleiarar første dagen. Andre dagen er sett av til work shop.