Inviterer til 50-års feiring av Folgefonnanlegga
Statkraft inviterer til ein open dag i Austrepollen, og feirar fem tiår med kraftproduksjon i Folgefonnanlegga.
Publisert
Sist oppdatert
Den 13. juni feirar Folgefonnanlegga 50-års jubileum ved Statkrafts administrasjonsbygg i Austrepollen. Regiondirektør Svein Ilstad og kraftverkssjef Vidar Riber i Statkraft ser fram til ein open dag med kulturelle innslag, mat- og kakeservering og boklansering.
– Folgefonnutbygginga var eit pionerprosjekt. For første gong vart det planlagt og bygd eit kraftverk som henta vatn frå ei isbre, seier regiondirektør i Statkraft Svein Ilstad i ei pressemelding i samband med arrangementet.
Annonse
Mauranger 2 blir Noregs fjerdje største
Statkraft påeikar at sidan 1974 har kraftverka bidrege med 65 TWh fornybar energi, i tillegg til inntekter til vertskommunane.
– Mauranger er kjend som Noregs første kraftverk som henta inn smeltevatn frå under ei isbre. No gler vi oss til å feire 50 år med kraftproduksjon ved Mauranger og Jukla kraftverk saman med lokalbefolkninga, seier kraftverkssjef Vidar Riber.
I tillegg til å feira kraftverket si 50 år lange historie, er Statkraft i full gang med å planlegga for framtidas kraftbehov med Mauranger 2, noko dei også nytta høvet til å informera om då Energi- og miljøkomiteen vitja kraftstasjonen i Austrepollen i mai.
Annonse
– Mauranger 2 er eit heilt nytt kraftverk ved sida av det gamle som, om det blir bygd, vil bidra med både kraft og effekt i ei region med stor etterspurnad etter fornybar energi. Mauranger 2 vil kunne bli Noregs tredje største kraftverk målt i installert effekt, og bidra med regulerbar kraft som kraftsystemet vårt er avhengige av når sola ikkje skinn og vinden ikkje blæs, seier regiondirektør Ilstad i pressemeldinga
Lanserer bok om Mauranger kraftverk
Som ein del av feiringa vil boka «Det kvite gullet» av forfattar Sigurd Vikøren lanserast.
– Boka har informasjon, intervju og bilete frå Mauranger og tida før, under og etter anlegget vart bygd. Ho gir eit historisk tilbakeblikk på eit samfunn før kraftverket kom til, menneska som var der og dei fem tiåra sidan, seier Statkraft om boka.
«Det kvite gullet» handlar også om nokre mørke kapittel i Folgefonnanleggenes si historie, som snøskredet i Rennedalen under bygginga av Mauranger kraftverk i 1970, der sju menneske mista livet.
