Inviterer klima- og miljøministeren til Hattebergsdalen

Som Grenda har skrive om tidlegare, har Endre Mehl og Målfrid Hatteberg fått avslag på søknaden om nydyrking i Hattebergsdalen. No har Folgefonna Nasjonalparkstyre inviterte klima- og miljøminister Espen Barth Eide (Ap) på synfaring.

– Med bakgrunn i Miljødirektoratet si overprøving av Folgefonna nasjonalparkstyre sitt vedtak om nydyrking i Hattebergsdalen, ynskjer styret å invitera statsråden til synfaring i saka, skriv leiar Sigrid Brattabø Handegard og nestleiar Hilde Enstad i Folgefonna Nasjonalparkstyre i eit brev til klima- og miljøministeren.

Finna ei løysing

Bakgrunnen for saka er at Endre Mehl og Målfrid Hatteberg ynskjer å overta ein familiegard i Hattebergstalen, men tilgang på grovfôr og areal gjer det vanskeleg. Dei søkte difor om nydyrking og fekk dette godkjent av Folgefonna Nasjonalparkstyre, som konkluderte med at tiltaket ikkje ville endra landskapet sin karakter vesentleg.

– Nasjonalparkstyret reagerte difor på at Statsforvaltaren i Vestland klaga inn vedtaket til Miljødirektoratet, som så gjorde om Nasjonalparkstyret sitt vedtak. Dette utan synfaring og dialog med aktuelle partar, står det å lesa i invitasjonen til Barth Eide.

Styret skriv vidare at dei meiner at denne type sakar må sjåast på i eit større heilskapsperspektiv.

– Vi er opne for å drøfta både omfang av tiltaket, og lengd på anleggsperiode, for å koma fram til ei løysing som ivaretek både framtidig jordbruksdrift og verneverdiane i Hattebergsdalen landskapsvernområde, heiter det i brevet.

To fluger i ein smekk

Men det er ikkje den einaste Rosendal-invitasjonen Barth Eide har i dette tidspunktet. For skulle ministeren takka ja til invitasjonen, kan han slå to fluger i ein smekk.

Prosjektgruppa som står bak den nye turstien rundt Hattebergfossen har nemleg invitert ministeren til å koma til Rosendal og stå for den offisielle opninga av den nye turstien i månadsskiftet april-mai.

– I byrjinga av mai ynskjer vi å invitera klima- og miljøministeren til offisiell opning av den nyopprusta turvegen rundt Hattebergfossen i Rosendal. Turvegen ligg i kulturlandskapet rundt Baroniet Rosendal, delvis i Hattebergsdalen landskapsvernområde, og er ein svært populær nærtur både for fastbuande og besøkjande, skriv prosjektgruppa, som består av Baroniet, grunneigarar, Rosendal turnlag og Kvinnherad kommune, i eit brev til ministeren.