Inviterer alle til Open dag
I halvtanna år har prosjektleiar Tove Omdal, saman med einingsleiarane Anne Tangen Rørdal og Tone Tufta Gaugstad, jobba med eit utviklingsprosjekt innanfor sjukeheimstenesta. No er dei klare til å presentera arbeidet.
– Me føler jo at me er litt tidleg ute når me no har jobba med dette over så lang tid i forhold til dei politiske føringane som har kome i seinare tid. Eg var på ein storkonferanse med statsforvaltaren, og då dei stod og prata og hadde innlegg så tenkte eg at dette er jo prosjektet vårt, det har me jo gjort. Då blei eg så stolt over prosjektet og det me faktisk har fått til, fortel einingsleiar for Husnes- og Halsnøytunet Anne Tangen Rørdal.
Framtidsplanlegging
Annonse
I løpet av prosjektet har dei utarbeida nye felles rutinar for alle tre lokasjonane, i tillegg til å teke tak i oppgåvefordelinga.
– Tanken med prosjektet har vore at ein skal tenkja at dei er éi teneste med tre lokasjonar. Me har også rydda ein del i oppgåvene. Me har sett på kven som løyser dei ulike oppgåvene slik at ein på den måten kan nytta best dei ulike fagpersonane innan sine fagfelt, forklarer Omdal.
– Dette er likevel ikkje noko kvikkfiks. Det å innarbeida ein ny kultur tek tid, men me har ein plan og jobbar langsiktig fram for å få gjennomført dei tiltaka me har hatt i prosjektet, fortset ho.
No er dei i sluttfasen og ynskjer å presentera arbeidet som har blitt gjort ved å nå ut til flest mogeleg gjennom å arrangera Open dag.
Annonse
– Me tenkte at me måtte gjera noko større ut av det, så me ynskjer å invitera absolutt alle til Open dag. Me ville gå ut så breitt som mogeleg og har fått med oss fleire samarbeidspartnarar. Både aktivitet og rehabilitering med fysioterapeuter og bustadsosial rådgjeving, som kan gje råd i høve ombygging av hus, lånemogelegheiter og den type ting, blir med, seier Omdal.
– Me har også fått med oss tannlege, brann og redning, heimetenesten, frivillighetssentralen og endå fleire. Dette med velferdsteknologi blir også ein viktig del av det heile, og ein kan til dømes kome og få kurs i korleis ein kan navigera diverse nettstader, fortset prosjektleiaren.
Omdal meiner det er viktig å setja i gong ein tankeprosess for alle dei som byrjar å koma litt opp i åra.
– Det er viktig å planleggja litt framover. Kan eg bu i det huset eg bur i eller bør eg tenkja meg om og kanskje skaffa meg ein leilegheit? Eller kan eg gjera noko med det huset eg har? Det er jo det me vil, at folk skal kunne meistre å bu heima lengst mogeleg, men då må ein ha tenkt gjennom litt fyrst, seier Omdal.
Omdal påpeikar også at både omsorgsbustad og bufellesskap blir rekna som å bu heime.
Informasjon med kaffidrøs
Annonse
Dagen er likevel ikkje berre for dei som stig i gradene aldersmessig, men også for både pårørande, helsefagstudentar eller kven som helst som ynskjer å koma og drøsa over ein kopp kaffi med noko godt attåt.
– Arrangementa skal føregå i kantineområdet på alle sjukeheimane med både stands og eit eige kaféområde. Ein skal kunna setja seg ned og ha ei hyggjeleg stund, eller gå litt fram og tilbake etter eige ynskje, fortel prosjektleiaren.
– Det blir ein dag der ein skal kunne få svar på alt ein måtte lura på, samtidig som ein kan kosa seg i kafeen og nyta dei flotte musikkinnslaga som me også skal ha med, fortset ho.
Den fyrste dagen med Open dag vert på Husnestunet 26. september, tett etterfylgt av Rosendalstunet 27. september og Halsnøytunet 28.september.
– Kom og ta lunsjen din med oss den dagen, oppmodar einingsleiarane.
