Intimkonsert mellom ruinane
Det vart fargerikt, stemningsfullt og fuktig då Hilde Selvikvåg endeleg fekk haldt konsert på Halsnøy kloster.
Publisert
Konserten hadde vore utsett i halvanna år fram til fredag kveld. I løpet av utsetjingsperioden hadde artisten frå Jæren lært seg eit nytt instrument. Selvikvåg hadde såleis fleire strengar å spela på under den våte hagekonserten. Gitartimane hadde ho fått av gitarvirtuos og artist Thomas Dybdahl.
Rundt femti personar hadde teke turen til klosterhagen for å få med seg hendinga. Gjestene var røynde med det vestlandske sommarvêret, og stilte i regnklede alle regnbogens fargar. På benkene som var sett opp mellom dei gamle ruinane i hagen vart stemninga intim og unik, noko som høvde godt til dei personlege forteljingane som artisten delte imellom låtane.
Annonse
Magisk
Artisten sjølv skildra opplevinga som fantastisk, og takka publikum for oppmøte i gråvêret. Særleg takka ho den yngste blant publikum, Pia (8). Dei to song låta «Karusell» i lag, ein stor augneblink for dei båe.
– Takka vera dykk blei det ei magisk stund ute i regnet under dei gamle, vakre trea. Eg gler meg allereie til å koma attende hit, meldte Selvikvåg etter konserten.
Helen Petersen, som veksla nokre stumme blikk med lydmannen under toreskralla, kunne fortelja om gode attendemeldingar frå publikum. Sjølv om det vart ei fuktig gleda for dei som hadde møtt opp, sette det ikkje noko hinder for den gode opplevinga, korkje for arrangør eller publikum.
Annonse
– Inni gråvêret strøyma solfylte tonar og publikum kosa seg, samanfatta Petersen, og la til at klosteret gjerne høyrer meir til Selvikvåg framover.
Konserten var ein del av avrundinga av sommarsesongen i Halsnøy kloster. Kafeen i hovudhuset var open, og mange vart igjen etter konserten for å nytta seg av denne.
