Intimkonsert med Armar & Bein på klosteret
10. april byr Halsnøy kloster på ein kulturell godtepose. Etter utstillingsopning med fotografen Einar Sira stiller bandet Armar & Bein med konsert.
Publisert
Sist oppdatert
– Armar & Bein er ei oppleving, både visuelt og musikalsk. Dei har ein heilt unik speleglede, så denne konserten kan anbefalast på det varmaste, melder Helén Petersen på vegne av Halsnøy kloster og Sunnhordland museum.
Billettsalet er allereie i gong og Petersen oppmodar folk om å bestille billett på nett for å sikre seg plass. Det er nemleg berre 35 personar som får gleda av å høyre bandet når dei kjem til Halsnøy komande helg.
Annonse
Bandmedlemmene i Armar og Bein har fartstid frå mange ulike samanhengar, til dømes Nurk Twins, Smalhans, Bernad Jenkins, Asfalt og Stavangerensemblet.
– Vi er særs glade for å ha dei med i samband med utstillilngsopninga til Einar Sira tidlegare på ettermiddagen, og dermed også opne påskeveka på høveleg vis, melder arrangøren på Facebook.
Rock, blues og cubanske rytmar
Armar & Bein starta opp i 1999. I utgangspunktet skulle bandet presentere songar av Tom Waits, Van Morrison og Bob Dylan. Tekstane til desse fenomenale artistane vart oversett til norsk, og framført på kav stavangersk. Sidan har det også snike seg inn nokre eigenskrivne songar i coverlåtparadiset.
Annonse
– Det blir rock, blues og cubanske rytmar. Bandet turnerer eigentleg ikkje lenger, men eg har fått lokka dei til Kvinnherad. Dei speler saman fordi dei synes det er gøy, noko som gjer opplevinga heilt unik, forklarar Petersen.
