Inspeksjon avslørte store manglar på lasteskipet

Ifølgje avisa Sunnhordland var Sjøfartsdirektoratet om bord i lasteskipet «Basen» på torsdag. Fartøyet låg då i Ølen. Tilsynet, som ikkje var varsla på førehand, enda med at skipet ikkje kan brukast inntil vidare.

– Tilstanden på skipet er av ein slik karakter at det må gjerast ein god del utbetringar og tiltak før dei får sigla igjen, sa seniorrådgjevar Marit Nilsen i Sjøfartsdirektoratet til Sunnhordland.

Påkøyrt på fjorden: – Hoppa i sjøen i siste sekund

Ho la til at det vart funne så mykje å setja fingeren på, at ein ikkje rakk å bli ferdig med inspeksjonen.

Ifølgje nettstaden Marinetraffic.com er «Basen» 44,63 meter lang og 8,82 meter brei. Laurdag ligg skipet framleis i Ølen.

Totalt uforståeleg

«Basen» er eigd av reiarlaget Sealg i Førde. Til Bergens Tidende har dagleg leiar og styreleiar Kjetil Hugøy opplyst at mannskapet på «Basen» bestod av skipper og styrmann frå Norge samt to sjømenn frå Polen. Skipet har to radarar montert. Hugøy seier det som skjedde på tysdag er «totalt uforståeleg». BT har også spurd skipper Bjørn Inderhaug om kvifor dei ikkje såg fritidsbåten.

– Folk flest trur gjerne at vi ser alt på radaren, men småbåtar kan vera vanskelege å få auga på. Dei dukkar gjerne berre opp glimtvis. Vi sit ikkje og nistirar på havet. Hadde vi det gjort, ville vi blitt heilt utslitne, sa han til BT.

«Basen» er bygd i 1966. Då ulukka skjedde, hadde skipet nett lasta grus i Sandvikjo og skulle til Norheimsund.