Innstiller på å byggja ny barneskule like ved Kvinnherad Arena

Kommunedirektøren innstiller på at det skal byggjast ny Husnes barneskule som skal stå ferdig til skuleåret 2024/25.

– Det vert å byggja ny Husnes barneskule, som skal stå ferdig til skuleåret 24/25. Skulen skal plasserast på ferdigregulert tomt for formålet like ved Kvinnherad Arena på Husnes, står det å lesa i innstillinga frå kommunedirektøren i saksutgreiing til Levekårsutvalet.

Det vert lagt til:

«Ein ser at det kan vera utfordrande å få til ei god løysing for ein framtidsretta skule på eksisterande tomt, og kostnadane for dette alternativet med ombygging og tilbygg er tilnærma lik som for nybygg på ny tomt. Eksisterande bygg er ikkje tilpassa dagens og framtidas pedagogikk. Det vil krevja omfattande ombyggingar og store investeringar for å rusta opp bygget til å bli eit funksjonelt, fleksibelt og føremålstenleg bygg for dei aktuelle funksjonane», står det å lesa i saksutgreiinga.

Norconsult og administrasjonen si tilråding er å gå for alternativ to, at det vert sett opp eit nytt bygg på ny tomt ved Kvinnherad Arena. Eit alternativ som har estimert kostnad på 162,8 millionar kroner. Å behalda dagens skule med oppgradering og tilbygg, har ein estimert kostnad på 171,3 mill.