Innfører strengare nasjonale tiltak: – No er det alvor

Det vert strengare reglar for arrangement og uteliv for vaksne, i kulturlivet og på organiserte fritidsaktivitetar. I tillegg vert det skjenkestopp over heile landet.

Statsminister Jonas Gahr Støre (Ap) offentleggjorde nye og strengare nasjonale tiltak for å bremsa smitten i landet på måndagens pressekonferanse.

– Smitten i Norge aukar kraftig, og vi har no fått ny kunnskap om omikron-varianten, og kor raskt den kan spreia seg. Vi er inne i ein meir alvorleg situasjon. Regjeringa innfører difor strenge tiltak for å bevara kontrollen på pandemien, seier statsministeren.

Slitne

Omikron-varianten er meir smittsam, som fører til at fleire av oss vil bli smitta. Tidlegare måndag gjekk FHI ut og advarte mot at det dei neste vekene kunne bli opp mot 300.000 tilfelle kvar dag om det ikkje vart sett til livs nye og strengare tiltak.

– Vi har fått tydelege råd frå helsemyndigheitene om å innføra nye, strengare tiltak no. Vi er opptatt av å skjerma barn, unge og sårbare grupper, men dessverre vil også dei merka tiltaka i sin kvardag. Samtidig veit vi at mange som jobbar i helsetenesta og på skular og i barnehagar, er slitne no. Det forsterkar alvoret i situasjonen, seier Støre.

Regjeringa strammar inn på arrangement og uteliv for vaksne, kulturlivet og på organiserte fritidsaktivitetar. Det vert også innført skjenkestopp over heile landet.

– Vi gjer dette fordi det er situasjonar som er knytt med ein høg smitterisiko og der mange kan smittast på kort tid, seier helse- og omsorgsminister Ingvild Kjerkol.

Det vart spekulert i om Norge skulle gjera det same som Danmark gjorde i slutten av førre veke, nemleg å gje dei yngste tidleg juleferie. Det gjer dei ikkje.

Men alle barne- og ungdomsskular og barnehagar skal no drivast på gult nivå frå og med torsdag 16. desember. Vidaregåande skular og vaksenopplæring skal ha raudt nivå.

- Ta vaksinen

Det vert også utvida bruk av munnbind og sterkare føringar for bruk av heimekontor.

– Vi kjem også med ei tydeleg anbefaling om at uvaksinerte bør skjerma seg. Dei som blir innlagd på sjukehus på grunn av covid-19 er i hovudsak uvaksinerte mellom 40 og 60 år, i tillegg til eldre fullvaksinerte som endå ikkje har fått oppfriskingsdose. Delen uvaksinerte innlagde er svært høg samanlikna med kor stor del av befolkninga som er vaksinert, seier Kjerkol.

Statsminister Støre kom difor med ei klar oppmoding.

– Vi har eit offensivt verkemiddel, som også er vårt viktigaste tiltak. Og det er vaksinen. Ved å ta vaksinen beskyttar du deg sjølv og du beskyttar dine næraste som du er så glad i. Du beskyttar òg samfunnet som du er ein del av. Så eg oppmodar så sterkt som eg kan om å ta vaksinen, seier Støre.