Innfører felles leiing på to skular og barnehagar

Attende i mai 2021 fekk administrasjonen i oppdrag frå politikarane om å vurdera grep i skulesektoren for å «sikra ei meir driftsoptimal organisering innan og på tvers av einingane». Det har også kome politiske signal om at ein ynskjer færre leiarar i den kommunale organisasjonen.

Etter å ha vurdert kva som er mogleg å gjera innanfor Opplæringslova og Barnehagelova, vart det laga ein oversikt over kva einingar det er mogleg å samorganisera leiinga av. Oversikta vart så gjennomgått saman med hovudtillitsvalte i Utdanningsforbundet og Fagforbundet. Det er òg halde samtalar med leiarane for dei fire mest aktuelle einingane: Bringedalsbygda skule og barnehage og Uskedalen skule og barnehage. Dette er stader der skule og barnehage ligg under same tak.

– Det skal no takast ei avgjerd på kven av dei fire som skal fortsetja som einingsleiarar og kven som skal vera avdelingsleiarar. Avdelingsleiar vil få delegert personalansvar for tilsette på sitt fagområde. Einingsleiar vil ha personalansvar for avdelingsleiar og tilsette på sitt fagområde, fortalde kommunedirektøren.

Formelt blir det då éin einingsleiar for skulen og barnehagen i Uskedalen og éin einingsleiar for skulen og barnehagen i Herøysundet.

Større avstand

– Veldig positivt det som skjer i Uskedalen og Bringedalsbygda, men eg tenkjer vi må gå vidare. Kva gjer vi for å sjå på andre samordningar? spurde Ove Lemicka (Frp).

Gunn Berit Sandnes Fosse svarte at prosessen går vidare.

– No tek vi fyrst dei som er under eitt tak. I det vidare arbeidet blir det eventuelt skular og barnehagar som det er større avstand mellom, og då må vi vurdera dette opp mot lovgrunnlaget, utdjupa ho.

– Veldig bra, takka Lemicka.

NB! I opphavleg tekst stod det at skulane i Uskedalen og Bringedalsbygda skal få felles einingsleiar, det same for barnehagane i dei to bygdene. Dette vart retta søndag klokka 13.20.