Innertiar på Midthølen

Store og små jakta blink under «Skytingas dag» på Midthølen søndag.

Søndag gjekk «Skytingas dag» av stabelen i heile Noreg, og for første gong på to år kunne endeleg store og små jakta blink på 100-metersbanen på Midthølen.

Både ungdommar og familiar tok turen, og nokon konkurrerte uhøgtideleg mot kvarandre for å sjå kven som fekk flest treff på blink. Som fleire andre hadde kompisane og ti-åringane Sondre Bjelland Skeie og Sondre Mehl teke turen til Midthølen. Dei nytta dagen til å oppfriska skyteteknikken.

– Eg driv til vanleg med skiskyting, men eg synest det er kjekt å koma her å øve litt på teknikken, seier Mehl før han finn posisjonen sin på standplass.

Jamn kamp

Men før skota kunne hagla mot blinken, gav arrangørane nokre gode råd og tips rundt sikkerheit og sikte.

– Kvar pulje får fyrst fem prøveskot, deretter går me inn og hjelper dei som ynskjer med å til dømes finstilla siktet. Så skyt dei to skikkelege rundar der me tel poenga, seier Stig Sjo Kårstad, leiar i ungdomsutvalet til Kvinnherad Skyttarlag.

Og etter at Kårstad ropte eld skaut dei frammøtte både innertiarar og skivebom. Det var jamt mellom Sondre-gutane.

– Eg kunne klart betre, men det var litt uvant og skyta med støtte i forhold til reim, fortel Sondre Bjelland Skeie, som er medlem i Kvinnherad skyttarlag.

– Eg skaut litt høgt og litt for mykje til venstre, men alt i alt er eg nøgd. Mitt høgaste tal vart 10,9, smiler Mehl.

– Eg tok innpå deg litt mot slutten, sjølv om du vann med eitt poeng, seier Bjelland til kompisen med eit blunk.

Tre generasjonar

Ada Haugland Melheim på 8 år deltok også på «Skytingas dag» saman med familien, og ettersom mor Laila Haugland Melheim og bestefar Magne Haugland var med, var det heile tre generasjonar på standplass denne dagen. Ada hadde ikkje skote før, og var både spent og ivrig. Etter to fem-seriar imponerte ho med høge tal på den digitale skjermen.

– Det var skikkelig gøy, men til å byrja med var det litt vanskeleg å sjå gjennom begge sikta. Men eg klarte det betre i siste runde, og då traff eg to 10`arar, smilte ho stolt.

Leif Skeie i skyttarlaget fortalde at «Skytingas dag» blir arrangert for å syna fram noko av aktiviteten i Kvinnherad skyttarlag. Laget har mange medlemmar, men har alltid plass til fleire i alle aldrar.

– Det heile handlar jo om at vi ynskjer å visa fram sporten vår og skapa blest rundt den. Så me inviterer til ein open dag, der kven som helst kan koma å prøva seg. Det er jo ein sport alle kan halda på med, og det er jo veldig kjekt at det kjem så mange som det gjer, seier Skeie.

Alle som deltok vart løna med diplom, og leiar i skyttarlaget Synneva Seim bydde på vaflar, saft og kaffi i skyttarhuset.