Ingrid Guddal blir fabrikksjef i USA
Ingrid Guddal frå Seimsfoss er tilsett som den nye fabrikksjefen for Hydro sitt resirkuleringsanlegg for aluminium i Cassopolis i Michigan, USA.
Publisert
Sist oppdatert
I løpet av hennar fire år på Karmøy har Guddal vore med å leia verket til svært gode driftsresultat.
I ei pressemelding frå Hydro skriv dei følgjande om tida hennar i Hydro Karmøy:
Annonse
«Guddal kjem til stillinga etter fire år som fabrikksjef ved Hydro Karmøy, kor ho blant anna har vore sentral i ein vellykka verifisering av Hydro sin teknologipilot. Pilotanlegget i industriell skala opererer med om lag 15 prosent lavare energiforbruk enn verds-snittet, og har verdas mest klima- og energieffektive produksjonsteknologi for aluminium.»
Solid bakgrunn
Hydro held fram med å presentera den omfangsrike bakgrunnen Guddal hadde før ho tok til som fabrikksjef på Karmøy. Mellom anna har ho hatt fleire leiarroller i Hydro, ho har vore kommunedirektør i Odda (no Ullensvang) og jobba som rådgjevar for næringsklynger i Innovasjon Norge.
Ho har ein mastergrad i prosessteknologi frå Technische Universität Berlin i Tyskland og ein Executive Master i strategisk leiing frå Norges Handelshøyskole.
Annonse
Oppstart i 2023
Og våren 2023 flyttar ho til Cassopolis for å tiltre jobben som fabrikksjef der.
«Produksjonen ved Cassopolis vil starta i løpet av 2023. Anlegget vil ha rundt 70 tilsette. Cassopolis vil produsera 120.000 tonn med lavkarbon aluminium per år. Forventa investering er USD 150 millionar», heiter det vidare i pressemeldinga.
Ingrid Guddal vil då rapportera til Head of Recycling Operations, Hans Bjerkaas.
Hydro har starta opp arbeidet med å finna Guddal sin erstattar til Hydro Karmøy.
