Ingri (27) kan bli Årets Avløysar 2022

– Det er veldig kjekt å vera nominert. Det er stort, for det er mange som er med. Dessutan er det jo kjekt for laget, Landbrukstenester Folgefonna, at dei har med ein av sine kandidatar. Tidlegare har dei jo òg hatt to til med i kåringa, Tore Gunnar Hjortland og Janne Alsaker, og så har dei vore årets lag. Det er ein god arbeidsplass, slår Ingri fast.

I tillegg til å rosa arbeidsplassen, deler ho også nominasjonen med hundane Minto og Poppy. Dei er gode bidragsytarar i kvardagen som landbruksvikar.

Gjensidig trivsel

Ingri trivst godt i jobben, samstundes som bøndene kjem med gode attendemeldingar.

– Bøndene er stort sett nøgde, jobben er variert, og eg blir kjend med mange forskjellige stadar. Me dekkjer jo både Kvinnherad, Tysnes og Ullensvang, men jobbane blir stort sett fordelt slik at ein ikkje treng å reise så langt, forklarar 27-åringen.

I grunngjevinga kjem det mellom anna fram at Ingri både er pliktoppfyllande og godt likt. Ho gjer ein grundig jobb, og det er mange som ynskjer å ha ho i arbeid på garden sin.

Blest rundt yrket

Sidan 2000 har Norske Landbrukstenester (NLT) heidra ein avløysar gjennom denne årvisse kåringa.

17. august i år var det kome inn forslag på 40 gode kandidatar til årets avløysar 2022. 24 av dei stetta nominasjonskrava, og vart med vidare.

I denne runden enda Ingri opp med flest stemmer blant avløysar-kandidatane frå Vestland, og med det fekk ho plass i semifinalen.

Fram mot 5. oktober er det mogleg å stemme på den av dei ni kandidatane ein meiner fortener å bli årets avløysar 2022. Dei tre semifinalistane som har flest stemmer ved midnatt den 5. oktober blir invitert til NLT si haustsamling 26.-27. oktober. Der vil årets avløysar bli presentert og høveleg heidra.

– Ein av grunnane til at me har denne kåringa er for å skapa blest rundt yrket, seier Romar Skeie Olsen ved Norske Landbrukstenester.

Det kan òg føra til framtidig rekruttering, meiner han.

Gode vitnesbyrd

Om Ingri Helleland kan ein mellom anna lesa at ho aldri hadde mjølka kyr då ho starta som avløysar i 2018. Det var sau ho var oppvaksen med, og som framleis er den store lidenskapen hennar. Men i løpet av åra som landbruksvikar har ho tileigna seg mykje kunnskap som gjer at ho er til god støtte for bøndene.

Her er noko av det som ligg til grunn for at Ingri kan bli kåra til årets avløysar:

Ho ser dyra, avdekkjer om det er sjukdom, er grundig i arbeidet og oppteken av dyrevelferd. Ho kan ta over bruket til ein bonde uansett kva drift som er på bruket ved sjukdom. I tillegg er ho ein veldig flink samtalepartnar med bøndene.

Ingri sit og i styret i Landbrukstenester Folgefonna som tilsett representant. Den store lidenskapen til Ingri er sau og gjetarhund. Ho har fleire gjetarhundar i full trening som ho brukar når ho er på jobb for bøndene. Ho bistår bøndene med sanking, medisinering og lamming. I lamminga er Ingri fullbooka. Då stiller ho opp både natt og dag, og kan ha videovakt på eitt bruk samstundes som ho har fullt ansvar på eit anna.