Ingen planar for haustferien? Sjå vår oversikt:

Så her kjem ei slik oversikt:

Måndag 9. oktober: Haustferien kan få ein eventyrleg start dersom ein denne dagen tek turen til biblioteket og får med seg teaterstykket Ridder Aske.

– I denne framsyninga møter me igjen helten Espen Askeladd som reiser ut på nye eventyr, skriv Kvinnherad bibliotek i sitt haustprogram.

Stykket handlar om Espen Askeladd som ynskjer å bli ridder ved kongens bord, og som så blir utfordra til å kjempa mot både drakar og troll. Framsyninga passar best for born frå 3 år og oppover.

På haustferien sin fyrste dag kan ein også få med seg handballskulen som Kvinnherad handballklubb og Hydro Husnes arrangerer for born mellom 6-10 år.

På Ungdomsbasen Sør vert det turneringar biljard, bordtennis og Fifa på kvelden.

Tysdag 10. oktober: Haustferieveka fortset på strålande vis med vidt forskjellige aktivitetar som ein kan velje mellom, rett nok berre dersom ein er i korrekt aldersgruppe.

Handballskulen fortset også denne dagen for dei som er melde på der, men dersom ein ikkje er det kan ein ta turen til Folgefonnsenteret og bli med på deira familiedag.

– Begge dagane legg me opp til fleire sjølvstyrte aktivitetar, noko som betyr at borna må vera i fylgje med ein vaksen. Verven vaffel er stengt, men det vil vera mogeleg å kjøpe ein kopp kaffi og steike seg ein vaffel, skriv Folgefonnsenteret på sine sider om arrangementet.

Nokre av aktivitetane ein kan bli med på der er både natursti, strikkbåtbygging, og toving. Folgefonnsenteret ynskjer alle vel møtt.

Biblioteket held to opne framsyningar med Hønene på Holmedal. Her kan du oppleva hønen Vera, Fiken og Fiola. Her er det fyrst til mølla og ein bør melda seg på på epost til biblioteket.

Onsdag 11. oktober: Dette er dagen for alle Harry Potter-fans. Biblioteket arrangerer også i år ein eigen dag der ein kan bli med å leika i Galtvort sitt magiske rike. Hiv deg på dystralen eller sopelimen din og bli med på magitimar og brevsending, lag din egen tryllestad eller finn ut kva hus du er i på Galtvort. Biblioteket oppmodar alle om å kle seg i sitt finaste kostyme frå Harry Potter-verda.

På ungdomsbasen Sør inviterer dei til fest og ope hus i høve nyoppussinga. Her er alle velkomne og det vert servert kaka og Mauricio held musikkworkshop ilag med elevar frå kulturskulen.

Torsdag 12. oktober: I min søken etter eit ordtak om å få nye sjansar, som på fiffig og stilig vis kunne føra oss over til denne dagen sine valmogelegheiter, kom eg til kort. Så difor spurte eg mine flotte kollegaer til råds, men også dei kom til kort. Derimot så nytta journalist Nygård høve til å spreia om seg med indiske visdomsord;

«Alle har to liv. Det andre byrjar fyrst når du innser at du berre har eitt».

Så med den smidige overgangen kan eg fortelje at dersom du ikkje fekk med deg Folgefonnsenteret sin fyrste familiedag, får du ein ny sjanse no. Dei køyrer nemleg same program begge dagane.

På biblioteket kan ein få med seg Hobbyverkstad med Hilde Gry, kor ein kan få laga seg brette-pinnsvin eller fidget-popup.

Ungdomsbasen Sør arrangerar finalar i alle turneringar, og i tillegg kjem Sanko og lagar kebab!

Fredag 13.oktober: Denne dagen arrangerer Kvinnherad bibliotek til speledag med mellom anna Fifa-turnering.

Sundag 15. oktober: Ungdomsbasen Sør inviterar til «slækkedag» med preik, speling og avslapping.

Dersom ingenting av dette falt heilt i smak kan ein kanskje finna det ein treng for å skapa ein spanande og kjekk haustferie på Bua, som stadig har ting til utlåns.

God haustferie til dei som er heldige nok til å falla inn i den kategorien.