– Ingen gyldige sertifikat på MS «Sandnes»

– Faktum i saka er at dette fartøyet har ingen gyldige sertifikat for tida. Vi har heller ikkje innvilga nokre enkelt-fartsløyve. Dette har MS «Sandnes» vore klar over i lengre tid, og vi har hatt ein omfattande dialog med dei om vidareføring av sertifikat. Det har til og med vore ei klagesak der vi har fått medhald, seier Aarhus.

MS «Sandnes» fekk seglingsforbod

Sikkerheitsmanglar

Veteranskipet «Sandnes» vart laurdag i førre veke slept frå Stavanger til Leirvik, og vidare til Rosendal onsdag kveld.

– Då vi vart klar over at dei var på slep gjennom Lysebotn med passasjerar, valde vi å utføra eit tilsyn for å sjekka situasjonen og status om bord, seier Aarhus.

– Å slepa ein båt med passasjerar er ikkje tillate ut ifrå sikkerheitsmessige tilhøve. Når eit skip er utan gyldige sertifikat kan det berre slepast utan passasjerar om bord, fortset han.

I 2017 skreiv Stavanger Aftenblad at MS «Sandnes» hadde mista kaiplassen sin i Vågen på grunn av for dårleg sikkerheit.

– Eg kan ikkje kommentera den saken, då det var Stavanger Hamn si avgjersle, seier Aarhus.

– Det eg kan seie er at når vi behandlar saker er det utifrå eit sikkerheitsperspektiv.

Dagleg leiar for «Sandnes», Alf Kåre Olavesen meiner at saka som Stavanger Aftenblad har publisert er basert på ei stor misforståing.

– Vi har hatt kaiplass i vågen samanhengande i 15 år, seier han.

Kritikk frå mannskapet

Olavesen hevda i går at skipet har alle godkjenningar på plass og at det er forskjell på korleis regionkontora tolkar lovverket.

– Saka er behandla på vårt hovudkontor i Haugesund, og utfallet ville vorte det same om det var Stavanger eller Bergen som gjennomførde tilsynet. Grunnen til at det blei Bergen er rett og slett at det var det nærmaste kontoret til Rosendal, seier Dag Inge Aarhus.

Aarhus presiserer også at tilsynskontoret ikkje formelt har utskrive eit seglingsforbod, då skipet ikkje har gyldige godkjenningar og dermed ikkje har lov å segla uansett.